Dharmdarshan: સસ્તાના ચક્કરમાં ઘરમાં ન આવી જાય કંકાસ! સેકન્ડ-હેન્ડ સામાન ખરીદતા પહેલાં જાણી લો આ વાસ્તુ નિયમો

જ્યારે પણ આપણે કોઈ જૂની કે સેકન્ડ-હેન્ડ વસ્તુ ખરીદીએ છીએ, ત્યારે મનમાં એક વિચાર ચોક્કસ આવે છે કે આ વસ્તુ આપણા ઘર માટે અશુભ તો સાબિત નહીં થાય ને? વાસ્તુશાસ્ત્ર અનુસાર આવું વિચારવું સંપૂર્ણપણે સ્વાભાવિક છે.

દરેક ઉપયોગ કરેલી વસ્તુ સાથે તેના જૂના માલિકની ઉર્જા, તેના ઘરનું વાતાવરણ અને અનુભવો જોડાયેલા હોય છે. જો તે સામાન કોઈ નકારાત્મક કે તણાવપૂર્ણ વાતાવરણમાંથી આવ્યો હોય, તો તેની જૂની ઉર્જા તમારા ઘરની શાંતિ અને પરિવારના સભ્યોના જીવન પર નકારાત્મક અસર પાડી શકે છે.

જોકે, આનો અર્થ એ નથી કે જૂની વસ્તુઓ ન ખરીદવી જોઈએ. બસ તેને ઘરમાં મૂકતા પહેલાં વાસ્તુના થોડા સરળ ઉપાયો કરવાથી તેની નકારાત્મકતા દૂર કરી શકાય છે. સેકન્ડ-હેન્ડ સામાનને શુદ્ધ કરવા માટે આ ૬ વાસ્તુ ટિપ્સ ખાસ અપનાવો:

૧. ગંગાજળનો છંટકાવ કરવો

વસ્તુને બરાબર સાફ કર્યા પછી તેના પર થોડું ગંગાજળ છાંટવું. સનાતન પરંપરા અને વાસ્તુશાસ્ત્રમાં ગંગાજળને સૌથી પવિત્ર માનવામાં આવ્યું છે, જે કોઈપણ વસ્તુની અશુદ્ધિને દૂર કરે છે.

૨. સૂર્યપ્રકાશ અને તડકો બતાવવો

સૂર્યના કિરણો કુદરતી શુદ્ધિકરણનું કામ કરે છે. જૂના સામાનને ઓછામાં ઓછો એક આખો દિવસ તીવ્ર તડકામાં રાખી દો. આનાથી તેમાં રહેલી સુસ્ત અને નકારાત્મક ઉર્જા સંપૂર્ણપણે નષ્ટ થઈ જાય છે.

૩. મીઠાના પાણીથી સફાઈ કરવી

મીઠામાં નકારાત્મક ઉર્જા સોષી લેવાની અદ્ભુત ક્ષમતા હોય છે. જૂનું ફર્નિચર કે સામાન વાપરતા પહેલાં તેને મીઠું ઉમેરેલા પાણીથી બરાબર સાફ કરવું.

૪. કપૂર અને લોબાનનો ધૂપ

ભીમસેની કપૂર અથવા લોબાન સળગાવીને તેનો ધૂપ તે સામાનની આસપાસ ફેરવવો. આનાથી વાતાવરણ શુદ્ધ બને છે અને સકારાત્મકતા આવે છે.

૫. ફર્નિચર પર નવો કલર કે પોલિશ કરાવવો

જો જૂનું લાકડાનું ફર્નિચર ખરીદ્યું હોય, તો શક્ય હોય તો તેના પર નવો પેઇન્ટ કે પોલિશ કરાવી લેવો. નવો રંગ ચડવાથી જૂની ઉર્જાનો પ્રભાવ પૂરો થઈ જાય છે.

૬. પૂજાની ઘંટડી વગાડવી

સામાનને ઘરમાં યોગ્ય જગ્યાએ ગોઠવ્યા પછી ત્યાં પૂજાની ઘંટડી વગાડવી. ઘંટડીના પવિત્ર અવાજથી આસપાસનું વાતાવરણ શુદ્ધ થાય છે અને ઘરમાં સુખ-સમૃદ્ધિનો વાસ થાય છે.