કરોડો ભક્તોની આસ્થાનો સવાલ:: રામ મંદિર દાનપેટી કેસમાં RSSએ કરી નિષ્પક્ષ અને ઝડપી તપાસની માંગ

કર્ણાટકના બેલગાવીમાં રાષ્ટ્રીય સ્વયંસેવક સંઘની ત્રણ દિવસીય અખિલ ભારતીય પ્રાંત પ્રચારક બેઠક રવિવારે સફળતાપૂર્વક સંપન્ન થઈ હતી. સરસંઘચાલક ડૉ. મોહન ભાગવત અને સરકાર્યવાહ દત્તાત્રેય હોસબાલે સહિત દેશભરમાંથી 226 વરિષ્ઠ હોદ્દેદારોની ઉપસ્થિતિમાં મળેલી આ બેઠકમાં સંગઠન વિસ્તરણ અને સામાજિક વિષયો ઉપરાંત અયોધ્યા રામ મંદિરમાં દાનપેટીની ગણતરી દરમિયાન સામે આવેલી કથિત ગેરરીતિનો મુદ્દો મુખ્ય કેન્દ્ર સ્થાને રહ્યો હતો. સંઘે આ ઘટના અંગે ભારે દુઃખ વ્યક્ત કરીને આકરી પ્રતિક્રિયા આપી છે.

કરોડો ભક્તોની આસ્થાનો વિષય, તટસ્થ તપાસ જરૂરી

બેઠક બાદ જાહેર કરાયેલી સત્તાવાર અખબારી યાદીમાં સંઘે સ્પષ્ટ શબ્દોમાં જણાવ્યું છે કે, અયોધ્યા રામ જન્મભૂમિ મંદિરમાં દાનપેટીના ચઢાવાની ગણતરી દરમિયાન સામે આવેલી કથિત ગેરરીતિની ઘટના અત્યંત ગંભીર છે. RSSના મતે, આ કોઈ સામાન્ય કે માત્ર વહીવટી પ્રક્રિયાનો મામલો નથી, પરંતુ દેશ અને દુનિયાના કરોડો રામભક્તોની અતૂટ શ્રદ્ધા અને આસ્થા સાથે જોડાયેલો અત્યંત સંવેદનશીલ વિષય છે. સંઘે આ સમગ્ર મામલાની બિલકુલ નિષ્પક્ષ, પારદર્શી અને તાત્કાલિક તપાસ કરવાની માગ કરી છે જેથી સત્ય સામે આવી શકે.

ભવિષ્યની વ્યવસ્થા વધુ સુરક્ષિત અને પારદર્શક બને

રાષ્ટ્રીય સ્વયંસેવક સંઘે શ્રીરામ જન્મભૂમિ તીર્થ ક્ષેત્ર ટ્રસ્ટ પાસે એવી પણ અપેક્ષા વ્યક્ત કરી છે કે, આગામી સમયમાં મંદિરમાં આવતા દાન, ચઢાવા અને રોકડની ગણતરીની વ્યવસ્થાને વધુ મજબૂત, સુરક્ષિત અને સંપૂર્ણપણે પારદર્શક બનાવવામાં આવે, જેથી ભવિષ્યમાં આવી કોઈ શંકાસ્પદ ઘટના કે ગેરરીતિની આશંકા ન રહે.

બેઠકમાં અન્ય મહત્વના મુદ્દાઓ પર ચર્ચા

ત્રણ દિવસ ચાલેલી આ ઉચ્ચ સ્તરીય બેઠકમાં રામ મંદિરના મુદ્દા ઉપરાંત RSSના શતાબ્દી વર્ષના આગામી કાર્યક્રમો, સંગઠનનો વ્યાપ વધારવા, આગામી જનગણના, નશા મુક્તિ અભિયાન તેમજ વિવિધ સામાજિક જાગૃતિના કાર્યો અંગે પણ વિગતવાર રોડમેપ તૈયાર કરવામાં આવ્યો હતો.