Dharmdarshan: શું તમે પણ માથું ઢાંકીને પૂજા કરો છો? આજથી જ બંધ કરી દો નહિતર નહીં મળે સંપૂર્ણ ફળ

હિન્દુ ધર્મમાં પૂજા-પાઠ, જપ, ધ્યાન અને યજ્ઞ જેવા ધાર્મિક કાર્યો માટે અનેક નિયમો દર્શાવવામાં આવ્યા છે. ઘણીવાર લોકો આ નિયમો અને માન્યતાઓને લઈને દ્વિધામાં મુકાઈ જાય છે. જેમાંનો એક વિષય છે પૂજા કરતી વખતે માથું ઢાંકવું કે નહીં. સામાન્ય રીતે પૂજા કે હવન વખતે પુરુષો માથા પર રૂમાલ, ટુવાલ કે ખેસ મૂકી દેતા હોય છે. પરંતુ કૂર્મ પુરાણના ૧૩મા અધ્યાયના ૧૦મા શ્લોકમાં સ્પષ્ટ જણાવવામાં આવ્યું છે કે પૂજા કે કોઈ ધાર્મિક ગ્રંથનું પાઠ કરતી વખતે માથું ઢાંકવું ન જોઈએ.

માથું ઢાંકીને પૂજા કરવાનો શાસ્ત્રીય દ્રષ્ટિકોણ

ધાર્મિક માન્યતાઓ અનુસાર પૂજા દરમિયાન મન અને શરીર બંનેની શુદ્ધતા અત્યંત મહત્વપૂર્ણ છે. શાસ્ત્રો મુજબ માથું ઢાંકીને આચમન કરવું યોગ્ય માનવામાં આવતું નથી. જો તમે માથું ઢાંકીને આચમન કરો છો, તો તે ધાર્મિક રીતે શુદ્ધ ગણાતું નથી.

આ જ રીતે ધ્યાન કરતી વખતે પણ માથા પર કાપડ ઢાંકીને બેસવાની મનાઈ કરવામાં આવી છે. માન્યતા છે કે ધ્યાન દરમિયાન સાધકના મન અને વાતાવરણ વચ્ચે કોઈ આડશ ન હોવી જોઈએ. માથા પર કાપડ હોવાથી મનનું ધ્યાન ભંગ થઈ શકે છે. ઉપરાંત ધ્યાન સમયે ઈશ્વર તરફથી મળતી સકારાત્મક ઊર્જાને ગ્રહણ કરવામાં પણ બાધા ઉત્પન્ન થાય છે.

શું મહિલાઓએ પૂજા વખતે માથું ઢાંકવું જોઈએ?

ધાર્મિક શાસ્ત્રો અનુસાર મહિલાઓને પણ ઈશ્વરની પૂજા કે ધ્યાન કરતી વખતે માથું ઢાંકવાની જરૂર નથી. જોકે, આરતી લેતી વખતે કે પ્રસાદ ગ્રહણ કરતી વખતે ઈશ્વર પ્રત્યે આદર વ્યક્ત કરવા માથું ઢાંકી શકાય છે.

પરંતુ મહિલાઓના વાળ લાંબા હોવાથી પૂજા કે ધાર્મિક વિધિમાં પવિત્રતા જળવાઈ રહે તે માટે જો તેઓ માથું ઢાંકે છે તો તે વર્જિત માનવામાં આવતું નથી.

પૂજા-પાઠનો મુખ્ય હેતુ શ્રદ્ધા અને ભક્તિ પ્રગટ કરવાનો છે. તેથી ધ્યાન અને પૂજા સમયે માથું ખુલ્લું રાખવું જોઈએ અને માત્ર આરતી કે પ્રસાદ લેતી વખતે જ શુદ્ધતા અને આદર માટે માથું ઢાંકવું ઉત્તમ ગણાય છે.