Entertainment: 'મારી ગંદી ઓલાદ', બાદશાહના રોસ્ટ વીડિયો પર બોલ્યા યો યો હની સિંહ, ફરી શરૂ થશે વિવાદ?

બોલિવૂડ રેપર બાદશાહ અને યો યો હની સિંહ વચ્ચેનો જૂનો વિવાદ કોઈનાથી છૂપો નથી. બંને મ્યુઝિક આર્ટિસ્ટ અવારનવાર એકબીજા પર કટાક્ષ કરવાનો કોઈ મોકો છોડતા નથી. તાજેતરમાં સમય રૈનાના શો 'ઈન્ડિયાઝ ગોટ લેટેન્ટ સઝન ૨' માં બાદશાહની થયેલી રોસ્ટિંગ બાદ હની સિંહે ફરી એકવાર બાદશાહ પર નિશાન સાધ્યું છે, જેનાથી બંને વચ્ચે ફરી યુદ્ધ છેડાય તેવા સંકેત મળી રહ્યા છે.

સમય રૈનાના શોમાં બાદશાહ થયા રોસ્ટ

સમય રૈનાએ પોતાના શોના નવા એપિસોડમાં બાદશાહ, સૌરવ જોશી અને હર્ષ લિંબાચિયાને ગેસ્ટ તરીકે આમંત્રિત કર્યા હતા. આ દરમિયાન સમય રૈનાએ બાદશાહની સામે 'બ્રાઉન રંગ' ગીત ગાઈને પોતાને હની સિંહનો મોટો ફેન ગણાવ્યો હતો અને બાદશાહને સ્ટેજ નેમ બાબતે રોસ્ટ કર્યા હતા. આ રોસ્ટ વીડિયો સોશિયલ મીડિયા પર અત્યંત વાયરલ થયો હતો.

હની સિંહની તીખી પ્રતિક્રિયા

શો દરમિયાન સમય રૈનાએ બાદશાહને તેમના સ્ટેજ નેમ 'બાદશાહ' પાછળની કહાની પૂછી હતી. બાદશાહે દાવો કર્યો હતો કે આ નામ તેમણે પોતે જ પસંદ કર્યું છે. આ ક્લિપ વાયરલ થતાં જ હની સિંહે પોતાના ઈન્સ્ટાગ્રામ સ્ટોરી પર તે વીડિયો શેર કરતાં લખ્યું- "મારી ગંદી ઓલાદ".

આ ઉપરાંત બાદશાહનો એક જૂનો વીડિયો પણ વાયરલ થઈ રહ્યો છે જેમાં તેઓ સ્વીકારી રહ્યા છે કે તેમનું નામ 'બાદશાહ' હની સિંહે જ રાખ્યું હતું. આ વીડિયો પર કોમેન્ટ કરતાં હની સિંહે લખ્યું, "મારી નાલાયક ઓલાદ". હની સિંહની આ તીખી પ્રતિક્રિયા સોશિયલ મીડિયા પર ભારે ચર્ચાનો વિષય બની છે.

ક્યારથી શરૂ થયો હતો આ વિવાદ?

ઉલ્લેખનીય છે કે હની સિંહ અને બાદશાહ એક સમયે 'માફિયા મુંડીર' નામના મ્યુઝિક ગ્રૂપનો ભાગ હતા. પરંતુ બાદમાં 'બ્રાઉન રંગ' ગીતના ક્રેડિટને લઈને બંને વચ્ચે મતભેદ થતાં તેઓ અલગ થઈ ગયા હતા. બાદશાહનો દાવો છે કે આ ગીત તેમણે લખ્યું હતું, જ્યારે હની સિંહ આ વાત સ્વીકારવા તૈયાર નથી. હવે જોવાનું એ રહેશે કે હની સિંહના આ નિવેદન પર બાદશાહ શું પ્રતિક્રિયા આપે છે.