Entertainment: 'મીમ કિંગ' રવિ કિશન મિર્ઝાપુરમાં પણ છવાયા, ડાયલોગબાજી અને ટશનથી લૂંટી લાઈમલાઈટ

ઓટીટીની સૌથી સુપરહિટ અને લોકપ્રિય વેબ સીરીઝ 'મિર્ઝાપુર' હવે મોટા પડદા પર ધમાકો કરવા માટે સંપૂર્ણપણે તૈયાર છે. 'મિર્ઝાપુર ધ મુવી' નામથી થિયેટર્સમાં રિલીઝ થવા જઈ રહેલી આ બહુપ્રતિક્ષિત ફિલ્મનું ધમાકેદાર ટ્રેલર રિલીઝ કરી દેવામાં આવ્યું છે. આ ટ્રેલરે મિર્ઝાપુરની એ જ ગુનાખોરી અને ટશનથી ભરેલી દુનિયાની ઝલક ફરી એકવાર દર્શકો સમક્ષ રજૂ કરી છે.

ફિલ્મમાં સીરીઝની પહેલી સીઝનના તમામ લોકપ્રિય પાત્રો તો જોવા મળશે જ, પરંતુ આ વખતે કેટલાક નવા કલાકારોની પણ એન્ટ્રી થઈ છે. બોલિવૂડ અને ભોજપુરી સિનેમાના દાસ કલાકાર રવિ કિશન, મોહિત મલિક અને સુશાંત સિંહ આ ફિલ્મમાં મહત્વની ભૂમિકા ભજવતા નજરે પડશે.

રવિ કિશને ટ્રેલરમાં જમાવ્યો સિક્કો

ટ્રેલરમાં દરેક કલાકારે પોતપોતાનો અંદાજ બતાવ્યો છે, પરંતુ આ બધા વચ્ચે રવિ કિશને પોતાના થોડા સમયના સ્ક્રીન ટાઈમમાં જ આખી લાઈમલાઈટ ચોરી લીધી છે. પંકજ ત્રિપાઠી, દિવ્યેન્દુ અને અલી ફઝલ જેવા દમદાર કલાકારોની હાજરી છતાં રવિ કિશને પોતાની આગવી ડાયલોગબાજીથી ટ્રેલરમાં જબરદસ્ત વજન ઊભું કર્યું છે. પહેલી ફ્રેમથી જ તેમની એક્ટિંગ અને સ્વેગ દર્શકોને મંત્રમુગ્ધ કરી દે તેવા છે.

'મીમ કિંગ' તરીકે સોશિયલ મીડિયા પર ટ્રેન્ડિંગ

ઉલ્લેખનીય છે કે રવિ કિશન આજકાલ સોશિયલ મીડિયા પર 'મીમ કિંગ' તરીકે છવાયેલા છે. તેમના 'જલ્દી ધ લેટ' અને 'મની ફોલોઝ બ્રધર' જેવા નિવેદનો પર અસંખ્ય મીમ્સ બની રહ્યા છે. તેમનો દરેક અંદાજ, ડાન્સ અને નિવેદનો યુવાનોમાં ખૂબ ટ્રેન્ડ કરી રહ્યા છે. આવામાં 'મિર્ઝાપુર ધ મુવી' ના ટ્રેલરમાં તેમણે જે ધમાકો કર્યો છે, તેનાથી તેમનો ક્રેઝ વધુ વધી ગયો છે.