Entertainment: 4000 કરોડની રામાયણનો ધમાકો! ૭૫ કરોડમાં વેચાયા ફિલ્મના મ્યુઝિક રાઈટ્સ, બન્યો નવો રેકોર્ડ?

નમિત મલ્હોત્રાની ફિલ્મ 'રામાયણ' હિન્દી સિનેમામાં કમાણીના મામલે ઈતિહાસ રચશે કે નહીં, પરંતુ રિલીઝ પહેલા જ તેણે રેકોર્ડ તોડવાનું શરૂ કરી દીધું છે. આ ફિલ્મે મ્યુઝિક રાઈટ્સ વેચવાના મામલે ઘણી મોટી ફિલ્મોને પાછળ છોડી દીધી છે. 'રામાયણ'ના મ્યુઝિક રાઈટ્સ ટી-સિરીઝે (T-Series) ૭૫ કરોડ રૂપિયામાં ખરીદી લીધા છે.

રામાયણની ઐતિહાસિક ડીલ!

પિંકવિલાના અહેવાલ મુજબ, 'રામાયણ' ફિલ્મના મ્યુઝિક રાઈટ્સ માટે સોની મ્યુઝિક (Sony Music) અને ટી-સિરીઝ વચ્ચે હરાજી બોલાઈ હતી. જેમાં સોની મ્યુઝિકે ૭૦ કરોડ રૂપિયાની ઓફર મૂકી હતી, પરંતુ ટી-સિરીઝે ૭૫ કરોડ રૂપિયાની સૌથી મોટી બોલી લગાવીને આ ડીલ પોતાના નામે કરી લીધી હતી. જોકે રિપોર્ટ્સનું માનીએ તો નમિત મલ્હોત્રા ૧૦૦ કરોડ રૂપિયાની મ્યુઝિક રાઈટ્સ ડીલ કરવા માંગતા હતા, છતાં ૭૫ કરોડ રૂપિયા પણ ભારતીય સિનેમાની ખૂબ જ વિરાટ મ્યુઝિક ડીલ માનવામાં આવે છે. જોકે, હજુ સુધી મેકર્સ તરફથી આ અંગે સત્તાવાર પુષ્ટિ કરવામાં આવી નથી.

આ પહેલાં હિન્દી સિનેમા તરફથી 'ધુરંધર દ રિવેન્જ' ફિલ્મે સૌથી મોંઘી મ્યુઝિક ડીલ સાઈન કરી હતી. ત્યારે પણ ટી-સિરીઝે ૫૪ કરોડ રૂપિયામાં મ્યુઝિક રાઈટ્સ ખરીદ્યા હતા. હવે રણબીર કપૂર સ્ટારર 'રામાયણ'ના મ્યુઝિક રાઈટ્સ પણ તેમની પાસે જ છે. રસપ્રદ વાત એ છે કે ટી-સિરીઝે ત્રણ વર્ષ પહેલાં 'આદિપુરુષ' પણ પ્રોડ્યુસ કરી હતી, જે રામાયણની વાર્તા પર આધારિત હતી પરંતુ તે સમયે તેને તીવ્ર ટીકાઓનો સામનો કરવો પડ્યો હતો.

સોની પિક્ચર્સ સાથે ગ્લોબલ કોલેબોરેશન

નમિત મલ્હોત્રા 'રામાયણ'ના ડિસ્ટ્રિબ્યુશનના મામલે પણ એક અનોખો રેકોર્ડ બનાવવા જઈ રહ્યા છે. તેમણે 'સ્પાઈડરમેન' બનાવતી પ્રખ્યાત કંપની સોની પિક્ચર્સ સાથે હાથ મિલાવ્યા છે. સોની પિક્ચર્સ 'રામાયણ'ને વર્લ્ડવાઈડ રિલીઝ કરશે, જેથી દુનિયાના દરેક ખૂણે ફિલ્મને શ્રેષ્ઠ સ્ક્રીન્સ અને દર્શકો મળે. વધુમાં, 'રામાયણ' ફિલ્મનું ટ્રેલર હોલીવુડની સૌથી મોટી ફિલ્મોમાંથી એક 'સ્પાઈડરમેન: બ્રાન્ડ ન્યૂ ડે' સાથે થીયેટરોમાં દર્શાવવામાં આવશે.

જો વાત કરીએ રામાયણના મ્યુઝિકની, તો ઓસ્કાર વિજેતા એ.આર. રહેમાને હોલીવુડના દિગ્ગજ સંગીતકાર હંસ ઝિમર (Hans Zimmer) સાથે મળીને ફિલ્મનું બેકગ્રાઉન્ડ મ્યુઝિક અને ગીતો તૈયાર કર્યા છે. હંસ ઝિમર એ જ સંગીતકાર છે જેમણે વિશ્વની સૌથી વધુ કમાણી કરનારી ફિલ્મોમાં સંગીત આપ્યું છે. નિતેશ તિવારી દ્વારા ડિરેક્ટ કરવામાં આવેલી આ અલ્ટીમેટ ફિલ્મનો પહેલો ભાગ આ વર્ષે દિવાળી પર સિનેમાઘરોમાં રિલીઝ થશે.