Entertainment: 'ડરપોક સરકાર, સરમુખત્યાર જેવું વર્તન': સોનમ વાંગચુક પર એક્શનથી ભડક્યા પ્રકાશ રાજ, મોદી સરકાર પર કર્યા આકરા પ્રહારો

દિલ્હીના જંતર-મંતર પર વિરોધ પ્રદર્શન કરી રહેલા સામાજિક કાર્યકર્તા સોનમ વાંગચુકને શનિવારે (18 જુલાઈ) દિલ્હી પોલીસ દ્વારા પરાણે સફદરજંગ હોસ્પિટલ ખસેડવામાં આવ્યા છે. આ ઘટનાને પગલે પ્રદર્શનકારીઓમાં ભારે રોષ જોવા મળી રહ્યો છે અને હોસ્પિટલ પરિસરમાં મોટો હોબાળો થયો છે. વાંગચુકને હોસ્પિટલ લઈ જતી વખતે પોલીસે તેમને ચારેયબાજુથી સફેદ ચાદર વડે કવર કરી લીધા હતા જેથી કોઈ કંઈ જોઈ ન શકે. આ સમગ્ર ઘટનાક્રમ પર જાણીતા અભિનેતા પ્રકાશ રાજ, રણવીર શૌરી અને અતુલ કુલકર્ણી જેવા કલાકારોએ સોશિયલ મીડિયા પર તીખી પ્રતિક્રિયા આપી છે.

પ્રકાશ રાજનો સરકાર પર જોરદાર કટાક્ષ

પ્રકાશ રાજની આકરી પ્રતિક્રિયા: "પડદાની પાછળ શું છે? ૫૬ ઈંચની ધ્રૂજતી નગ્નતા અને ડર. આખી દુનિયા એક એવી ડરપોક સરકારને જોઈ રહી છે, જે યુવાનો સાથે વાતચીત કરવા નથી માંગતી પરંતુ સરમુખત્યારો (તાનાશાહો) જેવું વર્તન કરે છે. સોનમ વાંગચુકને બળજબરીથી લઈ જવા અને વિદ્યાર્થીઓના શાંતિપૂર્ણ વિરોધ પ્રદર્શનમાં અવરોધ ઊભો કરવો એ ડરની નિશાની છે. આ ખૂબ જ શરમજનક બાબત છે."

રણવીર શૌરી અને અતુલ કુલકર્ણીએ પણ સાધ્યું નિશાન

અન્ય બોલિવૂડ કલાકારોએ પણ સરકારની આ સૈન્ય જેવી કાર્યવાહી સામે અવાજ ઉઠાવ્યો છે:

• અતુલ કુલકર્ણી: તેમણે વર્ષ 1984નો એક ઐતિહાસિક કિસ્સો યાદ કરાવ્યો હતો. જ્યારે સોનમ વાંગચુકના પિતા સોનમ વાંગ્યાલ ભૂખ હડતાળ પર બેઠા હતા, ત્યારે તત્કાલીન વડાપ્રધાન ઇન્દિરા ગાંધી પોતે લેહ દોડી ગયા હતા અને તેમનો ઉપવાસ પૂરો કરાવ્યો હતો. અતુલ કુલકર્ણીએ સોશિયલ મીડિયા પર પોસ્ટ શેર કરીને લખ્યું, "ઉપવાસ તોડાવવાની આ પણ એક રીત છે."

• રણવીર શૌરી: અભિનેતા રણવીર શૌરીએ આડકતરો પ્રહાર કરતા લખ્યું, "આ સરકાર હવે પોતે જ વિપક્ષને મજબૂત કરી રહી છે. કેટલી ઉમદા વાત છે!" ઉલ્લેખનીય છે કે કોંગ્રેસથી લઈને આમ આદમી પાર્ટી સુધીના તમામ વિપક્ષી નેતાઓ સોનમ વાંગચુકના સમર્થનમાં જંતર-મંતર પહોંચવા લાગ્યા છે.

શા માટે 21 દિવસથી અનશન પર હતા સોનમ વાંગચુક?

બોલિવૂડ હસ્તીઓએ કરી હતી અનશન પૂરો કરવાની અપીલ

સોનમ વાંગચુકના આ આંદોલનને આમ જનતા સહિત અનેક મોટી હસ્તીઓનું સમર્થન મળ્યું હતું. જોકે, તેમની બગડતી તબિયતને જોઈને ઋત્વિક રોશન, આમિર ખાન, નસીરુદ્દીન શાહ, અનુરાગ કશ્યપ, ઝીનત અમાન, અદિતિ રાવ હૈદરી, કુશા કપિલા અને સ્વરા ભાસ્કર સહિતના કલાકારોએ તેમને ઉપવાસ સમાપ્ત કરવા વિનંતી પણ કરી હતી. હાલમાં તેમને હોસ્પિટલમાં દાખલ કરાતા રાજકીય ગરમાવો આવી ગયો છે.