Entertainment: નેટફ્લિક્સના ઓફિસમાંથી ચોરાઈ નિકોલસ કેજની ફિલ્મ! પ્રોડ્યુસરે કર્યો ₹1000 કરોડથી વધુનો દાવો

હોલિવૂડ અને OTT જગતમાંથી એક ખૂબ જ ચોંકાવનારો કિસ્સો સામે આવ્યો છે. એક ફિલ્મ પ્રોડ્યુસરે પ્રખ્યાત OTT પ્લેટફોર્મ નેટફ્લિક્સ (Netflix) વિરુદ્ધ કેલિફોર્નિયાની કોર્ટમાં કેસ દાખલ કરીને $૧૦૫ મિલિયન (આશરે ₹૧૦૦૧.૯૭ કરોડ) ના વળતરની માંગ કરી છે. પ્રોડ્યુસરનો આરોપ છે કે હોલિવૂડ અભિનેતા નિકોલસ કેજ અભિનીત તેમની રિલિઝ ન થયેલી ફિલ્મની માસ્ટર કોપી નેટફ્લિક્સના સ્ટુડિયોમાંથી ચોરી થઈ ગઈ છે.

૭ વર્ષની મહેનત અને ₹૪૨૯ કરોડનું બજેટ

પ્રોડ્યુસર સાઈમન અફ્રામના વકીલોના જણાવ્યા અનુસાર, બીજા વિશ્વયુદ્ધ પર આધારિત 'ફોર્ટિટ્યુડ' (Fortitude) નામની આ ફિલ્મને બનતા ૭ વર્ષ લાગ્યા હતા અને તેમાં $૪૫ મિલિયન (આશરે ₹૪૨૯.૪૧ કરોડ) થી વધુનું રોકાણ કરવામાં આવ્યું હતું. પ્રોડ્યુસર્સે નેટફ્લિક્સને વેચવાના હેતુથી ફિલ્મની એક અનએનક્રિપ્ટેડ માસ્ટર હાર્ડ ડ્રાઈવ સોંપી હતી. જોકે, તેના થોડા દિવસો બાદ નેટફ્લિક્સ તરફથી ઈમેલ દ્વારા જાણ કરવામાં આવી હતી કે તેમની ઓફિસના ડેસ્ક પરથી આ હાર્ડ ડ્રાઈવ ચોરાઈ ગઈ છે.

પ્રોડ્યુસર્સનો દાવો: ફિલ્મની વેલ્યુ શૂન્ય થઈ ગઈ

પ્રોડ્યુસર્સે કોર્ટમાં દલીલ કરી છે કે હાર્ડ ડ્રાઈવ ચોરાઈ જવાના કારણે ફિલ્મ લીક થવાનો અને પાયરસી સાઈટ્સ પર મફતમાં ઉપલબ્ધ થવાનો ભય ઊભો થયો છે. હવે કોઈ પણ ખરીદદાર કે ડિસ્ટ્રિબ્યુટર આ ફિલ્મ ખરીદવા કે તેના માર્કેટિંગ પાછળ કરોડો રૂપિયા રોકવા તૈયાર થશે નહીં. નેટફ્લિક્સની બેદરકારીના કારણે ફિલ્મનું ભવિષ્ય અને તેની કિંમત સંપૂર્ણપણે નાશ પામી છે.

નેટફ્લિક્સે આરોપો નકાર્યા

આ કાનૂની કાર્યવાહીના જવાબમાં નેટફ્લિક્સે પોતાનો પક્ષ મૂકતા જણાવ્યું છે કે તેઓ કન્ટેન્ટની સુરક્ષાને ખૂબ જ ગંભીરતાથી લે છે અને ચોરીની તપાસમાં મદદ કરી રહ્યા છે. નેટફ્લિક્સે દાવો કર્યો હતો કે ફિલ્મના નિર્માતાઓ પરિસ્થિતિનો ગેરલાભ ઉઠાવીને માત્ર પૈસા પડાવવાનો પ્રયાસ કરી રહ્યા છે અને કંપની આ પ્રકારના અયોગ્ય દાવાઓને સ્વીકારશે નહીં.