Entertainment: 'સભ્ય સમાજમાં આ ચલાવી ન લેવાય...': ત્રિશા કૃષ્ણન-વિજય વિવાદમાં કંગના રનૌતની એન્ટ્રી, ઉધયનિધિ સ્ટેલિનની કસ્ટડી પર આપ્યું નિવેદન

સાઉથ સિનેમાની સુપરસ્ટાર અભિનેત્રી ત્રિશા કૃષ્ણન પર કથિત રીતે અશ્લીલ ટિપ્પણી કરવાના મામલે તમિલનાડુ પોલીસ દ્વારા વિપક્ષી નેતા ઉધયનિધિ સ્ટેલિનની અટકાયત કરવામાં આવી હતી. એક જાહેર સભા દરમિયાન ઉધયનિધિએ ત્રિશા વિશે વિવાદિત નિવેદન આપ્યું હતું, જેના આધારે તમિલનાડુના અભિનેતા-રાજકારણી વિજયની પાર્ટી TVK એ પોલીસ અને રાષ્ટ્રીય મહિલા આયોગમાં ફરિયાદ નોંધાવી હતી. હવે આ સમગ્ર વિવાદમાં બોલિવૂડ અભિનેત્રી અને ભાજપ સાંસદ કંગના રનૌતની પ્રતિક્રિયા સામે આવી છે.

કંગના રનૌતે ઉધયનિધિની કસ્ટડી પર શું કહ્યું?

પોતાના બોલ્ડ નિવેદનો માટે જાણીતી કંગના રનૌતે આ મામલે ત્રિશા કૃષ્ણન અને વિજયનું સમર્થન કર્યું છે. તેણે પોતાના સોશિયલ મીડિયા એકાઉન્ટ પર લખ્યું: "જાહેરમાં ગંદી ગાળો આપવી, દ્વિઅર્થી શબ્દોનો ઉપયોગ કરવો અને અશ્લીલ જોક્સ મારવા એ કોઈપણ સભ્ય સમાજમાં સ્વીકાર્ય નથી. આ અપરાધ માટે સ્ટેલિનને કસ્ટડીમાં લેવામાં આવ્યા હતા. ભલે તેઓ જામીન પર બહાર આવી ગયા હોય, પરંતુ આ એક સારો દાખલો બેસાડે છે."

બીજી તરફ, કસ્ટડી દરમિયાન ઉધયનિધિ સ્ટેલિનને જ્યારે પોલીસ વાનમાં લઈ જવામાં આવી રહ્યા હતા ત્યારે તેમણે પત્રકારોને જણાવ્યું હતું કે, આ બધું તેમને રમુજી લાગે છે. તેમણે દાવો કર્યો હતો કે તેમણે પોતાના નિવેદનમાં કોઈનું નામ લીધું ન હતું અને તેઓ પરિણામ ભોગવવા તૈયાર છે.

શું છે સમગ્ર ત્રિશા કૃષ્ણન-સ્ટેલિન વિવાદ?

કાાવેરી જળ વિવાદ અંગે વાત કરતી વખતે ઉધયનિધિએ કહ્યું હતું કે મુખ્યમંત્રી આ મુદ્દે મૌન છે. આ દરમિયાન સભામાંથી કોઈએ અભિનેત્રી ત્રિશાનું નામ લીધું, જેના પર ઉધયનિધિએ હસીને કાવેરી અને અભિનેત્રી વિશે અશોભનીય ટિપ્પણી કરી હતી, જેનાથી મોટો વિવાદ ઊભો થયો હતો.

દરમિયાન, મદ્રાસ હાઈકોર્ટે પોલીસને પૂછપરછ પૂર્ણ કર્યા બાદ ઉધયનિધિ સ્ટેલિનને મુક્ત કરવાનો આદેશ આપ્યો હતો. તમિલનાડુના એડવોકેટ જનરલે કોર્ટને ખાતરી આપી હતી કે સરકારનો હેતુ માત્ર મહિલાઓના હિતોનું રક્ષણ કરવાનો છે.