Entertainment: ફિલ્મ 'સતલુજ'ને થયું ભારે નુકસાન, ભરપાઈ માટે ગુરુદ્વારાઓમાં રખાઈ દાનપેટી, ડાયરેક્ટરની આવી પ્રતિક્રિયા

હની ત્રેહાનની જસવંત સિંહ ખાલરા પર બનેલી બાયોપિક 'સતલુજ' (જેનું અગાઉનું નામ 'પંજાબ '૯૫' હતું) છેલ્લા કેટલાક દિવસોથી ભારે વિવાદોમાં રહી છે. આ ફિલ્મને ઓટીટી પ્લેટફોર્મ Zee5 પર રિલીઝ કરવામાં આવી હતી, પરંતુ વિવાદ બાદ થોડા જ કલાકોમાં હટાવી લેવામાં આવી હતી. દિલજીત દોસાંઝ સ્ટારર આ ફિલ્મને સેન્ટ્રલ બોર્ડ ઓફ ફિલ્મ સર્ટિફિકેશન (CBFC) તરફથી મંજૂરી ન મળવાને કારણે અને જરૂરી કટ્સ ન કરવાના કારણે તેને થિયેટરોમાં રિલીઝ કરી શકાઈ નહોતી. હવે ફિલ્મમેકરે ખુલાસો કર્યો છે કે લોકો ફિલ્મના આર્થિક નુકસાનની ભરપાઈ કરવા માટે નાણાં એકત્ર કરવાનો પ્રયાસ કરી રહ્યા છે.

હની ત્રેહાને સોશિયલ મીડિયા પર શેર કરી નોટ

શુક્રવારે હની ત્રેહાને પોતાના ઇન્સ્ટાગ્રામ પર એક લાંબી નોટ શેર કરી હતી. તેમણે જણાવ્યું કે ફિલ્મ ૩ જુલાઈના રોજ Zee5 પર રિલીઝ થઈ હતી અને ૫ જુલાઈએ તેને હટાવી દેવામાં આવી હતી. તે સમય દરમિયાન લોકોને આ ફિલ્મ ખૂબ પસંદ આવી હતી. તેમણે ઉમેર્યું, "ત્યારથી અમને અનેક મેસેજ, કોલ અને ટ્વીટ્સ મળી રહ્યા છે. લોકો ખાલરા પરિવાર, દિલજીત ભાઈ અને અમારી સાથે સંપર્ક કરીને આર્થિક નુકસાનની ભરપાઈ માટે મદદ કરવા ઈચ્છે છે."

ગુરુદ્વારાઓમાં રખાઈ દાનપેટીઓ

હનીએ વધુમાં લખ્યું, "અમને એ પણ જાણવા મળ્યું છે કે ભારત અને વિદેશના કેટલાક ગુરુદ્વારાઓમાં દાનપેટીઓ (ગુલ્લક) રાખવામાં આવી છે, જ્યાં શુભચિંતકો 'સતલુજ'ના નિર્માતાઓને થયેલા નુકસાનની ભરપાઈ કરવા માટે નાણાં એકત્ર કરવાનો પ્રયાસ કરી રહ્યા છે. આ પ્રેમ અને સન્માન બદલ અમે આપ સૌનો આભાર માનીએ છીએ. પરંતુ આપનો પ્રેમ જ અમારા માટે પૂરતો છે, અને પૂર્ણ આદર સાથે અમે આ ફિલ્મ માટે કોઈ નાણાં, ભેટ કે દાન સ્વીકારી શકીએ નહીં."

દાન એકત્ર કરવા અંગે કરી સ્પષ્ટતા

ફિલ્મમેકરે સ્પષ્ટપણે જણાવ્યું કે આ આર્થિક નુકસાન છતાં 'સતલુજ' ફિલ્મ પોતાની એક અલગ ઓળખ બનાવશે. તેમણે ટીમના વતી રેકોર્ડ પર સ્પષ્ટતા કરી હતી કે, ફિલ્મ કે કોઈ સેવા/દાનના નામે કોઈના પણ દ્વારા એકત્ર કરવામાં આવેલા નાણાં સાથે 'સતલુજ' ટીમનો કોઈ સંબંધ નથી.

૪૮ કલાકની અંદર હટાવવામાં આવી હતી ફિલ્મ

જ્યારે ૪૮ કલાકની અંદર 'સતલુજ'ને Zee5 પરથી હટાવી દેવામાં આવી, ત્યારે આઈ એન્ડ બી (I&B) મંત્રાલયના એક અધિકારીએ જણાવ્યું હતું કે, ફિલ્મ પાસે થિયેટ્રિકલ રિલીઝ માટે જરૂરી સર્ટિફિકેટ નહોતું. પ્રોસેસ પૂરી કરવાના બદલે મેકર્સે માત્ર નામ બદલીને તેને OTT પ્લેટફોર્મ પર રિલીઝ કરી દીધી હતી. ફિલ્મ હટાવાયા બાદ અનેક લોકોએ તેને પાઇરેટેડ રીતે ડાઉનલોડ કરીને પબ્લિક સ્ક્રીનિંગ પણ કર્યું હતું.