Entertainment: બોલિવૂડમાં ડેબ્યૂ કરવા જઈ રહ્યો છે એલ્વિશ યાદવ, ટાઈગર શ્રોફ સાથે એક્શન ફિલ્મમાં આવશે નજરે

એલ્વિશ યાદવે (Elvish Yadav) પોતાના કરિયરની શરૂઆત એક યુટ્યુબર અને કન્ટેન્ટ ક્રિએટર તરીકે કરી હતી. ત્યારબાદ તે 'બિગ બોસ OTT ૨' સહિત અનેક રિયાલિટી શોમાં જોવા મળ્યો અને ઘર-ઘરમાં જાણીતો બન્યો. ગયા વર્ષે વેબ શો 'ઔકાત કે બહાર' થી એક્ટિંગની શરૂઆતમાં ડગ માંડ્યા બાદ હવે એલ્વિશ ખૂબ જ ટૂંક સમયમાં બોલિવૂડમાં પદાર્પણ (ડેબ્યૂ) કરવા જઈ રહ્યો છે.

વિક્કી જૈનની ફિલ્મથી બોલિવૂડમાં એન્ટ્રી

ટીવી એક્ટ્રેસ અંકિતા લોખંડેના પતિ વિક્કી જૈને પોતાના નવા પ્રોડક્શન હાઉસ 'VJ ગ્લોબલ/ફ્રેમ્સ'ની જાહેરાત કરી છે. તેમની આ પહેલી ફિલ્મમાં ટાઈગર શ્રોફ, અભિષેક બેનર્જી અને એલ્વિશ યાદવ મુખ્ય ભૂમિકામાં જોવા મળશે. આ મલ્ટીસ્ટારર એક્શન ફિલ્મનું નિર્દેશન પ્રખ્યાત કોરિયોગ્રાફર અને ડિરેક્ટર રેમો ડીસોઝા કરશે.

ક્યારથી શરૂ થશે શૂટિંગ?

અહેવાલો અનુસાર, આ માત્ર એક સિંગલ ફિલ્મ નથી પરંતુ એક મોટી એક્શન ફ્રેન્ચાઈઝી હશે. ટ્રેડ એનાલિસ્ટ તરણ આદર્શના જણાવ્યા અનુસાર, આ ફિલ્મનું શૂટિંગ ૧ ઓગસ્ટથી શરૂ થઈ ચૂક્યું છે.

ફેન્સમાં ભારે ઉત્સાહ

એલ્વિશ યાદવના બોલિવૂડ ડેબ્યૂના સમાચાર સામે આવતા જ તેના ફેન્સ સોશિયલ મીડિયા પર ખુશી વ્યક્ત કરી રહ્યા છે. ફેન્સે સોશિયલ મીડિયા પર તેને અભિનંદન આપતા લખ્યું કે, "છેલ્લા ૧૦-૧૨ વર્ષની તમારી મહેનતનું ફળ આખરે મળી રહ્યું છે. પહેલા યુટ્યુબ, પછી ટીવી અને હવે સીધા સિનેમા હોલમાં જોઈશું."

ઉલ્લેખનીય છે કે, એલ્વિશ યાદવ 'બિગ બોસ OTT ૨', 'પ્લેગ્રાઉન્ડ', 'MTV રોડીઝ' અને 'લાફ્ટર શેફ્સ' જેવા શોમાં જોવા મળી ચૂક્યો છે. આ ઉપરાંત, સાઉથ ફિલ્મોમાં કામ કરી ચૂકેલા જયપુરના અભિનેતા મુકેશ ગુપ્તા પણ ટાઈગર શ્રોફ અને એલ્વિશની આ એક્શન ફિલ્મમાં મહત્વના રોલમાં જોવા મળશે.