Entertainment: આતિફ અસલમ બોલ્યા- ભારતમાં 10 વર્ષથી બેન છું, જેણે પ્રતિબંધ મૂક્યો તેનો આભારી છું, ભારતીયો મને VPN પર સાંભળે છે

પાકિસ્તાની કલાકારોના ભારતમાં કામ કરવા પર પ્રતિબંધ હોવા છતાં તેમના ભારતીય ચાહકો આજે પણ તેમના સંગીત સુધી પહોંચવાનો કોઈને કોઈ રસ્તો શોધી લે છે. તાજેતરમાં એક ઈન્ટરવ્યુ દરમિયાન પાકિસ્તાની સિંગર આતિફ અસલમે જણાવ્યું કે આ પાબંધીઓએ તેમની કરિયરની દિશા તો બદલી, પરંતુ સાથે જ તેમને એક સ્વતંત્ર મ્યુઝિશિયન તરીકે પોતાને ઓળખવાની ઉત્તમ તક પણ આપી.

ભારતીય મ્યુઝિક ઈન્ડસ્ટ્રીથી પોતાની ગેરહાજરી અંગે વાત કરતાં આતિફ અસલમે કહ્યું, "ભારતમાં મારા પર બેન લાગ્યાને લગભગ ૧૦ વર્ષ થઈ ચૂક્યા છે. આ ભારત સરકારનો નિર્ણય હતો કે તેઓ પાકિસ્તાની કલાકારો પર પ્રતિબંધ મૂકશે. હવે પાકિસ્તાનમાં પણ ભારતીય કલાકારો પર બેન છે."

રાજકીય તણાવ બાદ લેવાયો હતો નિર્ણય

વર્ષ ૨૦૧૬ માં બંને દેશો વચ્ચે વધતા તણાવ બાદ ભારતમાં પાકિસ્તાની કલાકારો પરના નિયમો વધુ કડક કરવામાં આવ્યા હતા. સપ્ટેમ્બર ૨૦૧૬ માં 'ઈન્ડિયન મોશન પિક્ચર પ્રોડ્યુસર્સ એસોસિએશન' (IMPPA) એ પ્રસ્તાવ પસાર કરીને પાકિસ્તાની કલાકારો અને ટેકનિશિયનો પર રોક લગાવી દીધી હતી. ત્યારબાદ ૨૦૧૯ માં પુલવામા આતંકી હુમલા પછી 'ઓલ ઈન્ડિયા સિને વર્કર્સ એસોસિએશન' દ્વારા આ બેનને સંપૂર્ણપણે સખત કરી દેવામાં આવ્યો હતો.

'મારા ફેન્સ VPN ના માધ્યમથી ગીતો સાંભળે છે'

આતિફ અસલમે જણાવ્યું કે વર્ષોથી ભારતમાં ગીત રિલીઝ ન થયું હોવા છતાં તેમનું મ્યુઝિક ભારતીય શ્રોતાઓ સુધી પહોંચી રહ્યું છે. તેમણે ઉમેર્યું, "છેલ્લા ૧૦ વર્ષથી મેં ત્યાં કોઈ ગીત ગાયું નથી. છતાં મારા ચાહકો VPN ના માધ્યમથી ગીતો સાંભળે છે અને CD બનાવીને એકબીજાને આપે છે. મ્યુઝિક જ્યાં પહોંચવાનું છે, ત્યાં પહોંચી જ જાય છે."

"તેના માટે દુઃખી થવાની જરૂર નથી. હું હંમેશાં તમને કહેવા માંગતો હતો કે હું તમને સૌને મિસ કરું છું. મને ત્યાં કામ કરવાની યાદ નથી આવતી, પણ ભારતીય ચાહકોના પ્રેમની યાદ જરૂર આવે છે."

— આતિફ અસલમ, સિંગર

બેન મૂકનારાઓનો પણ માન્યો આભાર

આતિફે આશ્ચર્યજનક નિવેદન આપતાં કહ્યું કે તેઓ એ લોકોના પણ આભારી છે જેમણે તેમના પર પ્રતિબંધ મૂક્યો, કારણ કે આ અનુભવે તેમને એક કલાકાર તરીકે વધુ પરિપક્વ બનાવ્યા. તેમણે કહ્યું, "હું એ લોકોનો પણ આભાર માનું છું જેમણે મારા પર બેન લગાવ્યો, નહિતર હું મારી જાતને આટલી સારી રીતે ઓળખી ન શક્યો હોત."