Entertainment: અમિતાભ બચ્ચનના ₹90 કરોડ અને રણબીરના ₹3.31 કરોડ અયોધ્યામાં ઇન્વેસ્ટ, રામ મંદિર બન્યા બાદ સેલેબ્સમાં જમીન ખરીદવાની હોડ

અયોધ્યામાં ભવ્ય રામ મંદિરના નિર્માણ અને ઉદ્ઘાટન બાદ આ પવિત્ર નગરી વૈશ્વિક સ્તરે આધ્યાત્મિક પ્રવાસન અને લક્ઝરી રિયલ એસ્ટેટનું મોટું હબ બની ગઈ છે. અયોધ્યાના આ અભૂતપૂર્વ વિકાસને જોઈને બોલિવૂડના સુપરસ્ટાર્સ પણ અહીં કરોડો રૂપિયાનું રોકાણ કરી રહ્યા છે. સદીના મહાનાયક અમિતાભ બચ્ચને અયોધ્યામાં આશરે ₹૯૦ કરોડથી વધુનું રોકાણ કર્યું છે, જ્યારે અભિનેતા રણબીર કપૂરે પણ રામ મંદિર નજીક ₹૩.૩૧ કરોડનો લક્ઝરી પ્લોટ ખરીદ્યો છે.

બિગ બીની અયોધ્યામાં ૫ મોટી પ્રોપર્ટી

મેગાસ્ટાર અમિતાભ બચ્ચન અયોધ્યામાં 'ધ હાઉસ ઓફ અભિનંદન લોઢા' (HoABL) પ્રોજેક્ટ દ્વારા લક્ઝરી રિયલ એસ્ટેટમાં રોકાણ કરનારા પ્રથમ મોટા સેલિબ્રિટી બન્યા હતા. તેમનું કુલ રોકાણ ₹૯૦ થી ૧૦૦ કરોડની આસપાસ હોવાનો અંદાજ છે:

• સરયૂ પ્લોટ: રામ મંદિરના ઉદ્ઘાટન પહેલાં ખરીદાયેલો આશરે ૧૦,૦૦૦ ચોરસ ફૂટનો પ્લોટ, જેની કિંમત ₹૧૪.૫ કરોડ છે.

• હવેલી અવધ: ૫,૩૭૨ ચોરસ ફૂટનો પ્લોટ, જેની કિંમત ₹૪.૫૪ કરોડ છે.

• સરયૂ લક્ઝરી પ્લોટ: સરયૂ ડેવલપમેન્ટ નજીક આશરે ₹૪૦ કરોડમાં ખરીદાયેલો ૨૫,૦૦૦ ચોરસ ફૂટનો મોટો પ્લોટ.

• ૬૭ એકર જમીન: અમિતાભ બચ્ચનની ફેમિલી કંપની 'AB Corp Ltd' દ્વારા ₹૩૫ કરોડમાં ખરીદાયેલો જમીનનો વિશાળ ટુકડો.

• હરિવંશરાય બચ્ચન મેમોરિયલ ટ્રસ્ટ: પિતાની યાદમાં સ્મારક બનાવવા માટે રજિસ્ટર્ડ કરાયેલી ૫૪,૪૫૪ ચોરસ ફૂટની જમીન.

રણબીર કપૂરનું પણ કરોડોનું રોકાણ

ફિલ્મ 'રામાયણ'માં ભગવાન રામનું પાત્ર ભજવી રહેલા અભિનેતા રણબીર કપૂરે પણ અયોધ્યાના લક્ઝરી માર્કેટમાં મોટું રોકાણ કર્યું છે. તેમણે 'સરયૂ ટાઉનશિપ'માં ૨,૧૩૪ ચોરસ ફૂટનો પ્રીમિયમ પ્લોટ ₹૩.૩૧ કરોડમાં ખરીદ્યો છે. રણબીર કપૂરે આ રોકાણ અંગે જણાવ્યું હતું કે, આ રોકાણ એક દૈવી આમંત્રણ સમાન છે અને તે લાંબા સમય માટે પરિવારની એક ધરોહર બની રહેશે.

₹૮૫,૦૦૦ કરોડના ખર્ચે બદલાઈ રહી છે અયોધ્યાની સૂરત

અયોધ્યાને વિશ્વકક્ષાનું ધાર્મિક કેન્દ્ર બનાવવા માટે સરકાર દ્વારા ₹૮૫,૦૦૦ કરોડના ખર્ચે ઈન્ફ્રાસ્ટ્રક્ચર ડેવલપમેન્ટ કરવામાં આવી રહ્યું છે. જેમાં મહર્ષિ વાલ્મિકી ઈન્ટરનેશનલ એરપોર્ટ અને આધુનિક અયોધ્યા ધામ રેલ્વે સ્ટેશન કાર્યરત થઈ ચૂક્યા છે. આ સિવાય કાનપુર અને અયોધ્યાને માત્ર ૯૦ મિનિટમાં જોડનારા ૧૮૭ કિલોમીટર લાંબા 'નમો ભારત કોરિડોર'ને પણ મંજૂરી મળી ગઈ છે, જેના કારણે અહીં રિયલ એસ્ટેટના ભાવો આસમાને પહોંચ્યા છે.