Entertainment: કોણ છે દીપિકા પાદુકોણના એક્સ બોયફ્રેન્ડ મુઝમ્મિલ ઇબ્રાહિમ? 22 વર્ષ પહેલાં લકી અલીના હિટ ગીતથી મળી હતી ઓળખ

અભિનેતા મુઝમ્મિલ ઇબ્રાહિમ આ દિવસોમાં ભારે ચર્ચામાં છે. સોશિયલ મીડિયા પર અભિનેતાનો એક વીડિયો જોરદાર વાયરલ થઈ રહ્યો છે, જેમાં તેમણે બોલિવૂડ ક્વીન દીપિકા પાદુકોણ સાથેના પોતાના રિલેશનશિપ અને બ્રેકઅપ વિશે ખુલીને વાત કરી છે.

વાયરલ થઈ રહેલી ક્લિપમાં મુઝમ્મિલ ઇબ્રાહિમે સિદ્ધાર્થ કન્નન સાથેની વાતચીતમાં દાવો કર્યો હતો કે દીપિકા પાદુકોણ સાથે તેમનું બ્રેકઅપ મ્યુચ્યુઅલ (પરસ્પર સંમતિથી) નહોતું. વાસ્તવમાં, તેમણે પોતે દીપિકાને છોડી હતી અને તેમની સાથે બ્રેકઅપ કર્યું હતું. મુઝમ્મિલે એમ પણ કહ્યું હતું કે તેમને દીપિકા સાથે બ્રેકઅપ કરવાનો કોઈ અફસોસ નથી.

જોકે, આ વિવાદ વધતા અભિનેતાએ પ્રતિક્રિયા આપી છે અને પોતાના ઇન્સ્ટાગ્રામ એકાઉન્ટ પર એક પોસ્ટ શેર કરીને સ્પષ્ટતા કરી છે કે, "જે ઇન્ટરવ્યુની ચર્ચા થઈ રહી છે અને જેને ખોટી રીતે 'નવા દાવા' તરીકે હેડલાઈન આપવામાં આવી છે, તે એક વર્ષ કરતાં પણ પહેલાં રેકોર્ડ કરવામાં આવ્યો હતો. અત્યારે જે વાતો ફેલાવવામાં આવી રહી છે, તે એક લાંબી વાતચીતના નાના અંશ માત્ર છે."

મુઝમ્મિલે ઉમેર્યું કે તેમણે પોતાના ભૂતકાળના સંબંધો વિશે ખૂબ જ સન્માનજનક રીતે વાત કરી હતી, જેને ઓનલાઈન એડિટિંગ પછી ખોટી રીતે રજૂ કરવામાં આવી છે. આ વિવાદ બાદ સોશિયલ મીડિયા પર લોકો આ અભિનેતા વિશે જાણવા માટે ઉત્સુક બન્યા છે.

લકી અલીના સુપરહિટ ગીતથી મળી હતી ઓળખ

મુઝમ્મિલ ઇબ્રાહિમ મૂળ કાશ્મીરના રહેવાસી છે, જેઓ વર્ષ 2000ના દાયકાની શરૂઆતમાં પોતાના પરિવાર સાથે મુંબઈમાં સ્થાયી થયા હતા. તેમણે પોતાના કરિયરની શરૂઆત વર્ષ 2004માં લકી અલીના સુપરહિટ ગીત 'કભી ઐસા લગતા હૈ' (Kabhi Aisa Lagta Hai) થી કરી હતી. આ મ્યુઝિક વીડિયોમાં તેમના લુક્સ અને એક્ટિંગના ખૂબ વખાણ થયા હતા.

એક સમયે મોડેલિંગ વર્લ્ડના ટોપ મોડેલ હતા

મ્યુઝિક વીડિયોમાં આવ્યા પહેલા મુઝમ્મિલ ઇબ્રાહિમ મોડેલિંગ ક્ષેત્રનું એક જાણીતું નામ હતા. તેમણે 'મોસ્ટ ગ્લેમરસ મેલ મોડેલ'ના ઘણા એવોર્ડ્સ પોતાના નામે કર્યા છે. પોતાની આકર્ષક પર્સનાલિટીથી તેમણે બધાનું ધ્યાન ખેંચ્યું હતું. મોડેલિંગ ઉપરાંત, બે અલગ-અલગ ઘટનાઓમાં ડૂબતા લોકોના જીવ બચાવવા બદલ તેમને 'બ્રેવરી એવોર્ડ' (વીરતા પુરસ્કાર) પણ મળી ચૂક્યો છે.

મુઝમ્મિલ ઇબ્રાહિમનું ફિલ્મી કરિયર

ફિલ્મી સફરની વાત કરીએ તો, મુઝમ્મિલ ઇબ્રાહિમે વર્ષ 2007માં ફિલ્મ 'ધોખા' (Dhokha) થી એક્ટિંગ ડેબ્યુ કર્યું હતું. આ ફિલ્મમાં તેમના પર્ફોર્મન્સની પ્રશંસા થઈ હતી, પરંતુ બોક્સ ઓફિસ પર ખાસ ઓળખ ન મળી. આ પછી તેઓ 2009માં આવેલી ફિલ્મ 'હોર્ન ઓકે પ્લીઝ' અને 'વિલ યુ મેરી મી?' જેવી ફિલ્મોમાં પણ જોવા મળ્યા હતા.

આલિયા ભટ્ટ અને રણબીર કપૂર સાથે સ્ક્રીન શેર કરશે

લગભગ 8 વર્ષ સુધી ફિલ્મી દુનિયાથી દૂર રહ્યા બાદ, મુઝમ્મિલ ઇબ્રાહિમે OTT પ્લેટફોર્મ પર સુપરહિટ વેબ સિરીઝ 'સ્પેશિયલ ઓપ્સ' (Special Ops) થી ધમાકેદાર વાપસી કરી, જેમાં તેમના પાત્રને ખૂબ જ પસંદ કરવામાં આવ્યું.

હવે ચર્ચા છે કે તેઓ ટૂંક સમયમાં સંજય લીલા ભણસાલીની મોસ્ટ અવેટેડ ફિલ્મ 'લવ એન્ડ વોર' (Love and War) માં જોવા મળી શકે છે. આ ફિલ્મમાં રણબીર કપૂર, આલિયા ભટ્ટ અને વિક્કી કૌશલ મુખ્ય ભૂમિકામાં છે.