Entertainment: 'મેં 1000થી વધુ ઈંજેક્શન લીધા, શરીરનો શેપ બદલાઈ ગયો', તેજસ્વિની કોલ્હાપુરેએ વર્ણવી IVFની દર્દનાક આપવીતી

મોડલ અને એક્ટ્રેસ તેજસ્વિની કોલ્હાપુરેએ પ્રથમ વખત IVF (ઈન વિટ્રો ફર્ટિલાઇઝેશન) પ્રક્રિયા દરમિયાન સહન કરેલી તકલીફો વિશે ખુલ્લેઆમ વાત કરી છે. પદ્મિની કોલ્હાપુરેની નાની બહેન અને શ્રદ્ધા કપૂર તથા સિદ્ધાંત કપૂરની માસી તેજસ્વિનીએ જણાવ્યું કે માતા બનવાની તેમની સફર બિલકુલ આસાન નહોતી. તેમણે કહ્યું કે IVF દરમિયાન તેમને શારીરિક અને માનસિક એમ બંને રીતે ભારે મુશ્કેલીઓનો સામનો કરવો પડ્યો હતો અને તે તેમના જીવનનો સૌથી કઠિન તબક્કો હતો.

સિદ્ધાર્થ કન્નન સાથેના પોડકાસ્ટમાં વાતચીત કરતી વખતે તેજસ્વિનીએ ખુલાસો કર્યો કે તેમણે એક-બે નહીં પરંતુ પાંચ વખત IVF કરાવ્યું હતું. તેમના જણાવ્યા મુજબ આ પ્રક્રિયા અત્યંત દર્દનાક હોય છે અને દરેક વખતે ક્લિનિક જઈને ઈંજેક્શન લેવા આસાન નથી હોતા. તેમણે મહિલાઓને સલાહ આપી કે જો શક્ય હોય તો 35 વર્ષની ઉંમર પહેલા જ ફેમિલી પ્લાનિંગ કરી લેવું જોઈએ.

'મેં ખૂબ સહન કર્યું, IVF ખૂબ જ મુશ્કેલ પ્રક્રિયા છે'

તેજસ્વિનીએ પોતાની દર્દનાક સફર વિશે વાત કરતા કહ્યું કે, "મેં પાંચ વખત IVF કરાવ્યું. હું આ વિશે ખુલ્લેઆમ વાત કરું છું. આ દરમિયાન મેં ઘણું સહન કર્યું છે. IVF ખૂબ જ મુશ્કેલ પ્રક્રિયા છે. પહેલો અને બીજો તબક્કો ખૂબ કઠિન હોય છે, જ્યારે ત્રીજો, ચોથો અને પાંચમો તબક્કો સામાન્ય બની જાય છે. ક્લિનિક જવા અને ઈંજેક્શન લેવા માટે માનસિક રીતે ખૂબ જ મજબૂત થવું પડે છે. મેં જીવનમાં ખૂબ મોડેથી બાળક લાવવાનો નિર્ણય લીધો હતો, તેથી મારી સલાહ છે કે કૃપા કરીને 35 વર્ષની ઉંમર પહેલા બાળક પેદા કરી લો."

'મેં 1000થી પણ વધુ ઈંજેક્શન લીધા'

તેજસ્વિનીએ આગળ ઉમેર્યું કે, "આ પ્રક્રિયાની મારા પર શારીરિક અને માનસિક રીતે ખૂબ જ ખરાબ અસર પડી હતી. હું ત્યારે જેવી હતી અને અત્યારે જેવી છું, તેમાં ઘણો તફાવત આવી ગયો છે. માનસિક રીતે હું પહેલા કરતા વધુ મજબૂત બની છું, પરંતુ શારીરિક રીતે આટલા બધા ઈંજેક્શનને કારણે મારા શરીરનો આકાર જ બદલાઈ ગયો છે. મેં 1000થી વધુ ઈંજેક્શન લીધા હતા. જો તમારી પ્રેગ્નેન્સી પોઝિટિવ આવે તો ઈંજેક્શન બંધ થઈ જાય છે, પરંતુ મારી સાથે એવું ન થયું. પાંચમી વાતે હું લકી રહી. આ દરમિયાન મારે બે વાર મિસકેરેજ (ગર્ભપાત) પણ સહન કરવું પડ્યું હતું, જેનાથી માણસ માનસિક રીતે ભાંગી પડે છે."

લગ્નના આઠ વર્ષ પછી થઈ દીકરી

ઉલ્લેખનીય છે કે તેજસ્વિનીના લગ્ન ફિલ્મ પ્રોડ્યુસર અને એક્ટર પંકજ સારસ્વત સાથે થયા છે. લગ્નના લગભગ આઠ વર્ષ બાદ 30 જાન્યુઆરી 2015ના રોજ તેમની દીકરી વેદિકાનો જન્મ થયો હતો. તેજસ્વિની એક જાણીતા ફિલ્મી પરિવારમાંથી આવે છે. તેઓ પદ્મિની કોલ્હાપુરે અને શિવાંગી કોલ્હાપુરેના નાની બહેન છે. શિવાંગીના લગ્ન બોલીવુડ એક્ટર શક્તિ કપૂર સાથે થયા છે, જેથી તેજસ્વિની સંબંધમાં શ્રદ્ધા કપૂર અને સિદ્ધાંત કપૂરના માસી થાય છે. તેમણે 'મુઝે ચાંદ ચાહિયે' સીરિયલથી કરિયરની શરૂઆત કરી હતી અને 'રાવણ', 'અગ્લી' જેવી ફિલ્મોમાં કામ કર્યું છે.