Entertainment: ભારતમાં 'Spider-Man Brand New Day'નો જબરદસ્ત ક્રેઝ: માત્ર 3 દિવસમાં બોક્સ ઓફિસ પર રચ્યો નવો ઈતિહાસ

ટૉમ હોલેન્ડની નવી ફિલ્મ 'સ્પાઈડરમેન: બ્રાન્ડ ન્યૂ ડે' તેના નામની જેમ જ ભારતીય બોક્સ ઓફિસ પર દરરોજ એક નવો રિકોર્ડ બનાવી રહી છે. માર્વલ સિનેમેટિક યુનિવર્સ (MCU)ની આ સુપરહીરો ફિલ્મે ભારતીય થિયેટરોમાં કમાણીના તમામ જૂના આંકડાઓને ધ્વસ્ત કરી દીધા છે.

થિયેટરોમાં સ્પાઈડરમેનનો દબદબો

ભારતીય થિયેટરોમાં આ સમયે સ્પાઈડરમેનનો ભારે દબદબો જોવા મળી રહ્યો છે. આ વર્ષે રિલીઝ થયેલી હોલિવૂડ ફિલ્મોમાં આ સૌથી મોટી ફિલ્મ સાબિત થઈ રહી છે, જેની સામે અન્ય કોઈ હિન્દી કે સ્થાનિક ફિલ્મો ટકી શકતી નથી. દેશભરમાં આ ફિલ્મના આશરે ૧૭,૦૦૦ જેટલા શૉ ચાલી રહ્યા છે અને મોટાભાગના શૉમાં સરેરાશ ૭૦% જેટલી ઓક્યુપન્સી નોંધાઈ રહી છે.

નોંધનીય છે કે, 'સ્પાઈડરમેન ૪' એ પહેલા જ દિવસે ભારતમાં ₹૬૦ કરોડનું નેટ ઓપનિંગ કરીને 'એવેન્જર્સ એન્ડગેમ' જેવી મોટી ફિલ્મોના રિકોર્ડ તોડી નાખ્યા હતા. બીજા દિવસે વર્કિંગ ડે હોવા છતાં ફિલ્મે ૧૦૦ કરોડનો આંકડો વટાવી લીધો હતો.

3 દિવસમાં 150 કરોડ પાર કરનારી સૌથી ઝડપી ફિલ્મ

સૅકનિલ્ક (Sacnilk)ના રિપોર્ટ અનુસાર, શનિવારે (ત્રીજા દિવસે) આ ફિલ્મના કલેક્શનમાં ૩૫%નો ઉછાળો જોવા મળ્યો હતો. ફિલ્મે શનિવારે ₹૬૬.૭૫ કરોડનું નેટ કલેક્શન કર્યું હતું, જેની સાથે જ ભારતમાં આ ફિલ્મનું કુલ નેટ કલેક્શન ₹૧૭૬.૭૦ કરોડ સુધી પહોંચી ગયું છે.

આ સાથે જ 'સ્પાઈડરમેન: બ્રાન્ડ ન્યૂ ડે' ભારતીય બોક્સ ઓફિસ પર સૌથી ઝડપી ૧૫૦ કરોડ રૂપિયાનો આંકડો પાર કરનારી પહેલી હોલિવૂડ ફિલ્મ બની ગઈ છે. જે ઝડપથી ફિલ્મ કમાણી કરી રહી છે તે જોતાં પ્રથમ વિકએન્ડ પૂરો થતાં સુધીમાં આ ફિલ્મ 'સ્પાઈડરમેન: નો વે હોમ'નો રિકોર્ડ પણ સરળતાથી તોડી દેશે.