Entertainment: 'સોનમ ભાઈ કંઈક ખાઈ લો, હવે તો PM એ પણ ટ્વીટ કરી દીધું', સલમાન ખાનના બદલાયા સુર! આંદોલન સમેટી લેવા અપીલ

દેશભરમાં ચાલી રહેલા વિદ્યાર્થીઓના વિરોધ પ્રદર્શન વચ્ચે બોલીવુડ સુપરસ્ટાર સલમાન ખાને વધુ એક પોસ્ટ શેર કરીને વિદ્યાર્થીઓને ઘરે પરત ફરવાની અને સામાજિક કાર્યકર્તા સોનમ વાંગચુકને ભૂખ હડતાળ પૂરી કરવાની વિનંતી કરી છે.

સલમાન ખાને કરી આંદોલન પૂરું કરવાની અપીલ

સલમાન ખાને પોતાની તાજેતરની પોસ્ટમાં લખ્યું કે, શિક્ષણ હોય કે સુરક્ષા, વિદ્યાર્થીઓ દેશની સૌથી મોટી પ્રાથમિકતા છે. તેમણે કહ્યું કે હવે વિદ્યાર્થીઓએ વધુ ચિંતા કરવાની કે પોતાના માતા-પિતાને પરેશાન કરવાની જરૂર નથી. વડાપ્રધાનના તાજેતરના નિવેદનનો ઉલ્લેખ કરતા સલમાને વિશ્વાસ વ્યક્ત કર્યો હતો કે પેપર લીક માટે જવાબદાર લોકો સામે કડક કાર્યવાહી કરવામાં આવશે.

તેમણે વિદ્યાર્થીઓને સંબોધતા કહ્યું કે, "હવે તો માનનીય વડાપ્રધાનજીએ પણ ટ્વીટ કરી દીધું છે. મને પૂરો ભરોસો છે કે પેપર લીક કરનારાઓ સામે કડક પગલાં ચોક્કસ લેવામાં આવશે. મહેરબાની કરીને હવે તમે તમારા ઘરે અને માતા-પિતા પાસે પાછા ફરી જાઓ."

સોનમ વાંગચુક માટે ખાસ મેસેજ

સલમાને પોતાની પોસ્ટમાં સામાજિક કાર્યકર્તા સોનમ વાંગચુક માટે પણ ખાસ સંદેશ લખ્યો હતો. તેમણે લખ્યું કે, "સોનમ, હવે બહુ થઈ ગયું ભાઈ. આને વધારે આગળ ન ખેંચો. જો ભવિષ્યમાં જરૂર પડશે તો તે સમયે લડી લેજો, પણ અત્યારે કંઈક ખાઈ લો. તમે ચાહો તો હું મારા ઘરેથી જમવાનું મોકલી દઉં છું."

સલમાનનો આ અંદાજ સોશિયલ મીડિયા પર ખૂબ વાયરલ થઈ રહ્યો છે. જોકે, કેટલાક લોકો સલમાનની આ અપીલને વિદ્યાર્થીઓના હિત કરતાં સરકારના પક્ષમાં વધારે ગણાવી રહ્યા છે. ચર્ચા છે કે માત્ર એક જ દિવસમાં સલમાનના સુર બદલાઈ ગયા છે અને તેઓ આંદોલન પૂરું કરાવવાની વાતો કરી રહ્યા છે.

પહેલાં આંદોલનને ગણાવ્યું હતું જરૂરી

આ અગાઉ સલમાન ખાને વિદ્યાર્થીઓના આ આંદોલનને 'સાહસિક, શાંતિપૂર્ણ અને દેશના સારા ભવિષ્ય માટે જરૂરી' ગણાવ્યું હતું. તેમણે કહ્યું હતું કે પેપર લીક ખૂબ જ ગંભીર બાબત છે અને તેમને ખુશી છે કે દેશના યુવાનો બહેતર શિક્ષણ વ્યવસ્થા માટે એકજૂથ થયા છે. તેમણે આંદોલનમાં બાળકોને સાથ આપનારા માતા-પિતાની પણ પ્રશંસા કરી હતી.

તેમણે સ્પષ્ટ કર્યું હતું કે આ લડાઈ સંપૂર્ણપણે વિદ્યાર્થીઓની છે અને તેને કોઈ રાજકીય રંગ આપવો જોઈએ નહીં. સલમાને પોતાની જૂની પોસ્ટમાં એવી આશા પણ વ્યક્ત કરી હતી કે ભારત એવો દેશ બનવો જોઈએ જ્યાં શિક્ષણ સૌથી મોટો ટ્રેન્ડ બને અને સમગ્ર વિશ્વમાંથી વિદ્યાર્થીઓ અહીં અભ્યાસ કરવા માટે આવે.