Entertainment: પુષ્પક વિમાન... તલવાર ચલાવતી સાઈ પલ્લવી, રણબીરની 'રામાયણ'નું 'બાહુબલી' કનેક્શન!

નિતેશ તિવારીની મોસ્ટ અવેટેડ ફિલ્મ 'રામાયણ'ના નવા સીન્સ સામે આવતા જ પ્રેક્ષકોએ તેની સરખામણી ભારતીય સિનેમાની સૌથી મોટી બ્લોકબસ્ટર ફિલ્મ 'બાહુબલી' સાથે કરવાની શરૂઆત કરી દીધી છે. બંને ફિલ્મો પોતાના વિશાળ સ્કેલ, ભવ્ય સેટ્સ અને ભારે ભરખમ વિઝ્યુઅલ ઈફેક્ટ્સ (VFX) માટે જાણીતી છે. જોકે, આ તસવીરોને ધ્યાનથી જોતાં ટેકનિક અને મેકિંગના સ્તરે કેટલાંક મોટા તફાવત અને રસપ્રદ સમાનતાઓ પણ સામે આવે છે.

જ્યાં એક તરફ એસ. એસ. રાજામૌલીની 'બાહુબલી'માં રિયલ લોકેશન્સ અને ગ્રાઉન્ડ વર્કનો જાદુ સ્પષ્ટપણે જોવા મળતો હતો, ત્યાં 'રામાયણ' આધુનિક CGI અને આર્ટિફિશિયલ વિઝ્યુઅલ્સ પર વધુ નિર્ભર દેખાઈ રહી છે.

ભીડ અને ક્રાઉડ સીન્સમાં તફાવત

આ તસવીરોમાં સૌથી મોટો તફાવત ક્રાઉડ સીન્સમાં જોવા મળે છે. 'બાહુબલી'માં રાજામૌલીએ રિયલ જૂનિયર આર્ટિસ્ટ્સનો ઉપયોગ કર્યો હતો, જેનાથી દરેક ચહેરો અને એક્સપ્રેસન અલગ અને કુદરતી લાગતા હતા. જ્યારે 'રામાયણ'ના ક્રાઉડ સીન્સ જોતાં તે CGI અને VFX દ્વારા તૈયાર કરાયેલ એક સરખો (ક્લોન) પેટર્ન અનુભવાય છે.

વોટરફોલ અને નેચરલ લુક

'બાહુબલી'માં પ્રભાસ જ્યારે ધોધના પાણી વચ્ચે છલાંગ લગાવે છે, ત્યારે પાણીની ઝડપ અને ખડકો સંપૂર્ણપણે નેચરલ લાગે છે. બીજી તરફ, 'રામાયણ'માં રણબીર કપૂરનો ધોધ સામે પ્રાર્થના કરતો સીન શાંત અને સુંદર છે, પરંતુ બેકગ્રાઉન્ડનો વોટરફોલ ગ્રીન સ્ક્રીન અથવા ડિજિટલ બેકડ્રોપ જેવો અનુભવાય છે.

મહિલાઓના એક્શન સીન્સ

'બાહુબલી'માં અનુષ્કા શેટ્ટી (દેવસેના)ની તલવારબાજી અત્યંત આક્રમક અને ગ્રાઉન્ડેડ હતી. જ્યારે 'રામાયણ'માં સાઈ પલ્લવી હાથમાં ઢાલ અને તલવાર સાથે પ્રભાવશાળી લુકમાં જોવા મળે છે. જોકે, તેના બેકગ્રાઉન્ડના પિલર્સ અને સ્ટ્રક્ચર રિયલ સેટના બદલે 3D મોડલ જેવા વધુ દેખાય છે.

ઉડતું જહાજ અને પુષ્પક વિમાન

'બાહુબલી'માં હંસના આકારનું ઉડતું જહાજ બતાવવામાં આવ્યું હતું. બિલકુલ એ જ તર્જ પર 'રામાયણ'માં પુષ્પક વિમાન અથવા દિવ્ય રથની ઝલક જોવા મળી છે. ડિઝાઈનની બાબતમાં 'રામાયણ'નું પુષ્પક વિમાન વધુ ગ્લોસી અને મોર્ડન લાગે છે.

યુદ્ધના દ્રશ્યો અને ઐરાવત હાથી

'બાહુબલી'માં કાલકેય યુદ્ધનો સીન ધૂળ, માટી અને વાસ્તવિક સૈનિકો સાથે વધુ જમીની લાગતો હતો. તેમાં પ્રભાસ વિશાળ યુદ્ધ-હાથી પર ચડતો દેખાય છે જે રિયલ ટેક્સચર આપે છે. જ્યારે 'રામાયણ'માં દેવરાજ ઈન્દ્રના પૌરાણિક સફેદ હાથી 'ઐરાવત'ને બરફ અને વાદળો વચ્ચે ઉડતો દર્શાવાયો છે, જે સ્પષ્ટપણે CGI અને 3D એનિમેશનથી બનેલી ફૅન્ટેસી દુનિયાનો ભાગ લાગે છે.

અંતે, ભલે સેટ્સ અને ટેકનિકમાં તફાવત હોય, પરંતુ 'રામાયણ'ના ગ્રાન્ડ વિઝ્યુઅલ્સ અને 'બાહુબલી' સાથેની સરખામણીએ સોશિયલ મીડિયા પર ફેન્સનું ધ્યાન ખેંચ્યું છે અને ટ્રેલરને લઈને ઉત્સાહ વધારી દીધો છે.