Entertainment: 50 હજાર સ્ક્રીન પર રિલીઝ થશે 'રામાયણ'! સીએમ બોલ્યા- ઓસ્કર નહીં મળે તો નિરાશા થશે

રણબીર કપૂરની આગામી ફિલ્મ 'રામાયણ' (Ramayana) ને લઈને રોજેરોજ કોઈને કોઈ મોટું અપડેટ સામે આવી રહ્યું છે. હવે આ ફિલ્મે રિલીઝ પહેલાં જ એવો રેકોર્ડ બનાવી દીધો છે, જેણે દર્શકોની ઉત્સુકતા વધારી દીધી છે. મેકર્સે જાહેરાત કરી છે કે 'રામાયણ' ને વિદેશોમાં ૫૦ હજાર સ્ક્રીન્સ પર રિલીઝ કરવામાં આવશે. આ ઉપરાંત, મહારાષ્ટ્રના મુખ્યમંત્રી દેવેન્દ્ર ફડણવીસે પણ ફિલ્મના ભવ્ય વિઝ્યુઅલ્સના વખાણ કરતા એક મોટું નિવેદન આપ્યું છે.

વિદેશોમાં ૫૦ હજાર સ્ક્રીન પર રિલીઝ થશે 'રામાયણ'

ટ્રેડ એનાલિસ્ટ તરણ આદર્શે માહિતી આપી છે કે સોની પિક્ચર્સ આંતરરાષ્ટ્રીય માર્કેટમાં 'રામાયણ' નું વિતરણ (ડિસ્ટ્રિબ્યુશન) કરશે. અહેવાલો મુજબ, આ ફિલ્મને વિશ્વભરમાં ૫૦,૦૦૦ થી વધુ સ્ક્રીન્સ પર રિલીઝ કરવાની તૈયારી ચાલી રહી છે, જે કોઈ પણ ભારતીય ફિલ્મ માટે અત્યાર સુધીનો સૌથી મોટો ગ્લોબલ રિલીઝ પ્લાન ગણાય છે. વિશ્વભરના દર્શકો આ મહાકાવ્ય સાથે જોડાઈ શકે તે માટે મેકર્સે આંતરરાષ્ટ્રીય સ્તરે પણ તૈયારીઓ કરી લીધી છે.

સીએમ દેવેન્દ્ર ફડણવીસનું મોટું નિવેદન

મુંબઈના ફિલ્મ સિટીમાં નમિત મલ્હોત્રાની પ્રાઇમ વન ફેસિલિટીના ઉદ્ઘાટન પ્રસંગે મહારાષ્ટ્રના મુખ્યમંત્રી દેવેન્દ્ર ફડણવીસે 'રામાયણ' પર પૂરો ભરોસો વ્યક્ત કર્યો હતો. તેમણે કહ્યું કે આ ફિલ્મ આંતરરાષ્ટ્રીય સ્તરે ભારતનું નામ રોશન કરશે.

ફડણવીસે જણાવ્યું હતું કે, "જો 'રામાયણ' ને ઓસ્કાર એવોર્ડ નહીં મળે, તો મને વ્યક્તિગત રીતે નિરાશા થશે." તેમનું આ નિવેદન હવે સોશિયલ મીડિયા પર ખૂબ વાયરલ થઈ રહ્યું છે.

ભવ્ય વિઝ્યુઅલ્સ અને શાનદાર સ્ટારકાસ્ટ

ફિલ્મના વિઝ્યુઅલ્સ, VFX અને વિશાળ સ્કેલના ભારે વખાણ થઈ રહ્યા છે. સોશિયલ મીડિયા પર રણબીર કપૂરના ભગવાન રામના લુક અને યશના રાવણ અવતારની સૌથી વધુ ચર્ચા થઈ રહી છે.

ફિલ્મમાં રણબીર કપૂર ભગવાન રામ, સાઈ પલ્લવી માતા સીતા, યશ રાવણ, સની દેઓલ ભગવાન હનુમાન અને રવિ દુબે લક્ષ્મણની ભૂમિકામાં જોવા મળશે. આ મલ્ટીસ્ટારર ફિલ્મનું નિર્દેશન નિતેશ તિવારી કરી રહ્યા છે, જ્યારે નમિત મલ્હોત્રા તેના પ્રોડ્યુસર છે.

દિવાળી ૨૦૨૬ પર થશે રિલીઝ

'રામાયણ' નો પહેલો ભાગ દિવાળી ૨૦૨૬ ના પવિત્ર તહેવાર પર ૬ નવેમ્બરે સિનેમાઘરોમાં રિલીઝ થશે. આ ફિલ્મને ભારતીય સિનેમાના સૌથી મોટા અને મોંઘા પ્રોજેક્ટ્સમાંથી એક માનવામાં આવી રહી છે.