Entertainment: 'દુબઈ ભાગ્યો દાઉદ... મુંબઈ અંડરવર્લ્ડમાં સર્જાઈ ખાલીપો', રામ ગોપાલ વર્માએ કરી નવી ફિલ્મની જાહેરાત

'સત્યા', 'કંપની', 'D' અને 'સરકાર' જેવી આઇકોનિક ગેંગસ્ટર ફિલ્મો બનાવનાર નિર્દેશક રામ ગોપાલ વર્મા (RGV) બોલિવૂડમાં મોટા કમબેક માટે તૈયાર છે. લાંબા સમય બાદ રામ ગોપાલ વર્માએ પોતાની નવી હિન્દી ગેંગસ્ટર ફિલ્મ 'પોલીસ કંપની' (Police Company) ની સત્તાવાર જાહેરાત કરી છે. આ ફિલ્મમાં મુખ્ય ભૂમિકા માટે તેમણે હર્ષવર્ધન રાણેને કાસ્ટ કર્યા છે. આ ફિલ્મનું નિર્માણ ટી-સિરીઝ દ્વારા કરવામાં આવશે.

દાઉદ અને મુંબઈ અંડરવર્લ્ડ પર આધારિત હશે વાર્તા

સોશિયલ મીડિયા પર ફિલ્મની જાહેરાત કરતા RGV એ તેના પ્લોટ વિશે ખુલાસો કર્યો હતો. તેમણે જણાવ્યું કે આ ફિલ્મ અંડરવર્લ્ડ ડ્રગ લોર્ડ અને ડોન દાઉદ ઈબ્રાહિમ તથા તેની ગેંગની પૃષ્ઠભૂમિ પર આધારિત છે. દાઉદ જ્યારે પોતાના વિરોધી જૂથોનો સફાયો કરીને દુબઈ ભાગી ગયો, ત્યારે તેણે મુંબઈમાં ડી-કંપનીનું કામકાજ પોતાના ખાસ માણસ છોટા રાજનને સોંપ્યું હતું. પરંતુ પાછળથી બંને વચ્ચે પડેલી તિરાડને કારણે મુંબઈના અંડરવર્લ્ડમાં મોટો ખાલીપો સર્જાયો હતો.

એન્કાઉન્ટર સ્પેશિયાલિસ્ટ દયા નાયકથી પ્રેરિત ફિલ્મ

અંડરવર્લ્ડમાં સર્જાયેલા આ ખાલીપાનો ફાયદો ઉઠાવવા અન્ય ગેંગ્સ સક્રિય થઈ અને ગુનાખોરી ચરમસીમાએ પહોંચી ગઈ. આ સ્થિતિને નિયંત્રિત કરવા માટે ૧૯૯૭થી ૨૦૦૪ વચ્ચે એક સ્પેશિયલ પોલીસ સ્ક્વોડ બનાવવામાં આવી હતી, જેણે ૩૦૦થી વધુ ગેંગસ્ટર્સનો સફાયો કર્યો હતો. RGV ની ફિલ્મ 'પોલીસ કંપની' આ જ સ્પેશિયલ સ્ક્વોડ અને જાણીતા એન્કાઉન્ટર સ્પેશિયાલિસ્ટ દયા નાયકના જીવન તથા કિસ્સાઓથી પ્રેરિત છે. આ ફિલ્મમાં હર્ષવર્ધન રાણે મુખ્ય રોલ ભજવશે.