Entertainment: પ્રિયંકા ચોપરા: સર્જરીથી બગડ્યો નાકનો શેપ, બોલિવૂડે કર્યો બાયકોટ; છતાં દેશી ગર્લ કેવી રીતે બની 'ગ્લોબલ આઇકોન'?

"જો કોઈ તમને નકામા કહે, તો શું તમે ખરેખર નકામા થઈ જાઓ છો? બિલકુલ નહીં. બુરાઈ કરનારાઓને જે કહેવું હોય તે કહેવા દો. તમારા ભગવાન, પરિવાર અને ફેન્સ પ્રત્યે હંમેશા સાચા રહો અને તમારું બેસ્ટ આપો, બસ એટલું જ પૂરતું છે." આ માત્ર એક નિવેદન નથી, પરંતુ બોલિવૂડથી લઈને હોલિવૂડ સુધી પોતાની શરતો પર જીવનારી પ્રિયંકા ચોપરાની (Priyanka Chopra) જિંદગીનો અસલી નિષ્કર્ષ છે. ૧૮ જુલાઈના રોજ જન્મેલી પ્રિયંકા આજે પોતાનો ૪૪મો જન્મદિવસ ઉજવી રહી છે.

બરેલીની નાની ગલીઓમાંથી નીકળીને હોલિવૂડના રેડ કાર્પેટ સુધી પહોંચનારી પ્રિયંકાની આ સફર કોઈ ફિલ્મી સ્ક્રિપ્ટ કરતાં ઓછી રોમાંચક નથી.

અમેરિકામાં નસ્લીય ભેદભાવથી લઈને 'મિસ વર્લ્ડ' બનવા સુધીની સફર

૧૮ જુલાઈ ૧૯૮૨ના રોજ જન્મેલી પ્રિયંકાના માતા-પિતા ભારતીય સેનામાં ડૉક્ટર હતા, જેથી તેનું બાળપણ અલગ-અલગ શહેરોમાં વીત્યું. અભ્યાસ માટે જ્યારે તે અમેરિકા ગઈ, ત્યારે ત્યાં તેને ભયંકર નસ્લીય ભેદભાવ (Racism) અને બુલિંગનો સામનો કરવો પડ્યો હતો. લોકો તેને 'બ્રાઉની' કહીને ચીડવતા હતા. આનાથી તૂટીને તે ભારત પરત ફરી, પરંતુ આ કડવા અનુભવે તેને વધુ મજબૂત બનાવી દીધી. વર્ષ ૨૦૦૦માં માત્ર ૧૮ વર્ષની ઉંમરે 'મિસ વર્લ્ડ' નો ઐતિહાસિક ખિતાબ જીતીને તેણે આખી દુનિયામાં ભારતનો ડંકો વગાડ્યો.

શરૂઆતી રિજેક્શન, નેશનલ એવોર્ડ અને 'પદ્મશ્રી'

મિસ વર્લ્ડ બન્યા બાદ પણ બોલિવૂડમાં તેનો પ્રવાસ સરળ નહોતો. ફિલ્મ 'હમરાઝ' માંથી તેને રિપ્લેસ કરીને અમીષા પટેલને લઈ લેવામાં આવી હતી. ૨૦૦૩માં 'ધ હીરો' ફિલ્મથી બોલિવૂડ ડેબ્યુ કરનાર પ્રિયંકાએ 'અંદાજ', 'ડોન', 'ક્રિશ' અને 'બાજીરાવ મસ્તાની' જેવી બ્લોકબસ્ટર ફિલ્મો આપી. ફિલ્મ 'બર્ફી!' માં ભજવેલું 'ઝિલમિલ' નું પાત્ર તેના કરિયરનો માઈલસ્ટોન ગણાય છે.

• સિદ્ધિઓ: મધુર ભંડારકરની ફિલ્મ 'ફેશન' માટે પ્રિયંકાએ સર્વશ્રેષ્ઠ અભિનેત્રીનો 'નેશનલ ફિલ્મ એવોર્ડ' જીત્યો હતો.

• નાગરિક સન્માન: વર્ષ ૨૦૧૬માં ભારત સરકાર દ્વારા કલા ક્ષેત્રે તેના અભૂતપૂર્વ યોગદાન બદલ દેશના ચોથા સર્વોચ્ચ નાગરિક સન્માન 'પદ્મશ્રી' થી તેને નવાજવામાં આવી હતી.

કરિયરના પીક પર હોલિવૂડનો મોટો રિસ્ક અને બોલિવૂડનો 'કાળો સચ'

કરિયરની શરૂઆતમાં એક ખોટી સર્જરીના કારણે પ્રિયંકાના નાકનો શેપ બગડી ગયો હતો, જેના કારણે તેની હાથમાંથી ઘણી ફિલ્મો જતી રહી હતી. પ્રિયંકાએ પોતાની ઓટોબાયોગ્રાફી 'અનફિનિશ્ડ' (Unfinished) માં બોલિવૂડના એક ડાયરેક્ટરનો કાળો સચ ઉજાગર કરતા લખ્યું છે કે, એક ફિલ્મમેકરે તેને પ્લાસ્ટિક સર્જરી કરાવીને બ્રેસ્ટ અને બટ સાઈઝ વધારવાની ગંદી સલાહ આપી હતી.

જ્યારે તે બોલિવૂડમાં સફળતાના શિખરે હતી, ત્યારે તેણે અમેરિકન સીરીઝ 'ક્વોન્ટિકો' (Quantico) સાઈન કરીને મોટું જોખમ લીધું. ભારતમાં તેની ટીકા થઈ કે તેને અહીં કામ નથી મળી રહ્યું, પરંતુ પ્રિયંકાએ 'બેવોચ' જેવી ફિલ્મો અને ઈન્ટરનેશનલ સિંગલ્સ દ્વારા પોતાને ભારતની પ્રથમ સાચી ગ્લોબલ સ્ટાર તરીકે સ્થાપિત કરી દીધી.

અફેરના વિવાદો, લગ્ન અને બિઝનેસ એમ્પાયર

પ્રિયંકાનું નામ બોલિવૂડમાં અક્ષય કુમાર, શાહરૂખ ખાન અને શાહિદ કપૂર જેવા દિગ્ગજો સાથે જોડાયું. એક ઈન્ટરવ્યુમાં તેણે પોતાને 'સીરીયલ મોનોગેમિસ્ટ' ગણાવી હતી. જોકે, ૨૦૧૮માં તેણે અમેરિકન પોપ સ્ટાર નિક જોનાસ (Nick Jonas) સાથે જોધપુરના ઉમ્મેદ ભવન પેલેસમાં શાહી લગ્ન કર્યા. વર્ષ ૨૦૨૨માં સરોગસી દ્વારા તેમની દીકરી 'માલતી મેરી ચોપરા જોનાસ' નો જન્મ થયો.

બિઝનેસ વુમન પ્રિયંકા: પ્રિયંકા માત્ર એક્ટ્રેસ નથી પણ એક સફળ બિઝનેસવુમન પણ છે. ન્યૂયોર્કમાં તેની રેસ્ટોરન્ટ 'સોના', હેરકેર બ્રાન્ડ 'એનોમલી' અને પ્રોડક્શન હાઉસ 'પર્પલ પેબલ પિક્ચર્સ' તેના સફળ બિઝનેસ માઇન્ડના ઉદાહરણો છે.

44 વર્ષની ઉંમરે પણ પ્રિયંકા અટકવાની નથી. તે ટૂંક સમયમાં જ સાઉથના સુપરસ્ટાર મહેશ બાબુ સાથે દિગ્ગજ ડાયરેક્ટર એસ. એસ. રાજામૌલીની મેગા મુવી 'વારાણસી' માં મુખ્ય ભૂમિકામાં જોવા મળશે, જે સાબિત કરે છે કે તેના માટે ઉંમર માત્ર એક આંકડો છે.