Entertainment: પ્રદીપ રાવતના કારણે આમિર ખાનને મળી હતી 'ગજની', ડાયરેક્ટરને કરી હતી ખાસ ભલામણ

'લગાન', 'ગજની', 'સરફરોશ' અને 'છાવા' જેવી અનેક યાદગાર ફિલ્મોમાં મહત્વની ભૂમિકા ભજવનાર દિગ્ગજ અભિનેતા પ્રદીપ રાવતનું ૭૪ વર્ષની વયે કેન્સરના કારણે અવસાન થયું છે. ૪ ઓગસ્ટ ૨૦૨૬ના રોજ તેમના નિધનની ખબર સામે આવી હતી. તેઓ હિન્દી સહિત તમિલ, તેલુગુ, કન્નડ અને મલયાલમ સિનેમાનો મોટો ચહેરો હતા.

'ગજની'થી મળી અનોખી ઓળખ

પ્રદીપ રાવતે પોતાના કરિયરનો સૌથી યાદગાર રોલ આમિર ખાનની ફિલ્મ 'ગજની'માં ભજવ્યો હતો, જે તમિલ ફિલ્મની જ હિન્દી રીમેક હતી. તમિલ અને હિન્દી બંને ફિલ્મોમાં તેઓ જ મુખ્ય વિલન હતા. 'ગજની' ભારતીય બોક્સ ઓફિસ પર ૧૦૦ કરોડ રૂપિયાની કમાણી કરનારી પ્રથમ ફિલ્મ બની હતી.

સલમાન ખાન ડાયરેક્ટરની પહેલી પસંદ હતા

બહુ ઓછા લોકો જાણે છે કે ડાયરેક્ટર એ. આર. મુરુગદોસ 'ગજની' ફિલ્મના હિન્દી રીમેકમાં સલમાન ખાનને લેવા માગતા હતા. પરંતુ પ્રદીપ રાવત આ વાતથી સહમત ન હતા. પ્રદીપ રાવતે પોતે એક ઈન્ટરવ્યુમાં ખુલાસો કર્યો હતો કે તેમણે જ ડાયરેક્ટરને આ રોલ માટે આમિર ખાનનું નામ સૂચવ્યું હતું.

પ્રદીપ રાવતે કેમ આપ્યું આમિરનું નામ?

પ્રદીપ રાવતે જણાવ્યું હતું: "મુરુગદોસ કહેતા હતા કે મારે હિન્દીમાં 'ગજની' બનાવવી છે. મેં વિચાર્યું કે સલમાન ખાન થોડા ગુસ્સાવાળા સ્વભાવના છે અને મુરુગદોસ હિન્દી કે અંગ્રેજી બોલી શકતા ન હતા. મેં વિચાર્યું કે આ રોલ માટે આમિર ખાન સૌથી શ્રેષ્ઠ પસંદગી રહેશે કારણ કે તેઓ શાંત મગજના છે અને દરેક સાથે ખૂબ જ સન્માનથી વર્તે છે."

પ્રદીપ રાવતે આગળ કહ્યું હતું કે, "મેં મારા ૨૫ વર્ષના કરિયરમાં ક્યારેય આમિરને કોઈની સાથે ઊંચા અવાજે વાત કરતા કે અપમાન કરતા જોયા નથી. તેથી મેં સલમાનના બદલે આમિરના નામની ભલામણ કરી હતી."

ઉલ્લેખનીય છે કે 'ગજની' પહેલા પ્રદીપ રાવતે આમિર ખાન સાથે 'સરફરોશ' અને 'લગાન'માં કામ કર્યું હતું. 'ગજની'માં વિલન તરીકે તેમના અભિનયે દર્શકોના દિલ જીતી લીધા હતા અને હવે સિનેમાપ્રેમીઓ તેમને ખૂબ મિસ કરશે.