Entertainment: પ્રદીપ રાવતના હૃદયમાં હતા 6 બ્લોકેજ, કેન્સર રિપોર્ટ જોઈ રડી પડ્યો પરિવાર; 40 કિલો વજન ઘટ્યું હતું

દક્ષિણ ભારતીય સિનેમાથી લઈને બોલિવૂડની 'ગજની', 'લગાન' અને ટીવી શો 'મહાભારત'માં પોતાની એક્ટિંગનો જાદુ ચલાવનાર દિગ્ગજ અભિનેતા પ્રદીપ રાવત હવે આપણી વચ્ચે નથી રહ્યા. કેન્સર સામે લાંબી લડાઈ લડ્યા બાદ તેમણે અંતિમ શ્વાસ લીધા હતા. કેન્સર જેવી ગંભીર બીમારીથી ઝઝૂમતી વખતે પણ તેઓ સતત કામ કરતા રહ્યા હતા. પોતાના એક ઈન્ટરવ્યુમાં તેમણે સ્ટેજ ૪ કેન્સર અને હૃદયની બીમારીના દર્દના દિવસો વિશે ખુલીને વાત કરી હતી.

શૂટિંગ દરમિયાન બગડી હતી તબિયત

એક ઈન્ટરવ્યુમાં પ્રદીપ રાવતે જણાવ્યું હતું કે સાઉથની એક ફિલ્મમાં ફાઈટ સીન શૂટ કરતી વખતે તેમને અચાનક શ્વાસ લેવામાં તકલીફ થવા લાગી હતી. તપાસ કરાવતા માલૂમ પડ્યું કે તેમના હૃદયની ૫ નસોમાં ૯૦ ટકાથી વધુ બ્લોકેજ હતું. બાદમાં મુંબઈની એશિયન હાર્ટ હોસ્પિટલમાં વધુ તપાસ કરાવતા હૃદયમાં ૬ જગ્યાએ ગંભીર બ્લોકેજ હોવાનું સામે આવ્યું હતું. આ કારણે ૨૦૧૬માં તેમની બાયપાસ સર્જરી કરવામાં આવી, જેના લીધે તેમનું ૨૦ કિલો વજન ઘટી ગયું હતું.

બાયપાસ બાદ સ્ટેજ-4 કેન્સરનું નિદાન

બાયપાસ સર્જરીમાંથી બહાર આવ્યાના થોડા સમય બાદ તેમને મળમાંથી લોહી પડવાનું શરૂ થયું હતું. તપાસ કરાવતા ૨૦૧૮માં જાણ થઈ કે તેઓ સ્ટેજ ૪ કેન્સરથી પીડિત છે. તેમણે જણાવ્યું કે જ્યારે રિપોર્ટ આવ્યો ત્યારે પરિવારના તમામ સભ્યો આઘાતમાં સરી પડ્યા હતા અને રડવા લાગ્યા હતા. કેન્સરની સારવાર દરમિયાન તેમનું વધુ ૨૦ કિલો વજન ઘટ્યું, જેનાથી એકંદર ૪૦ કિલો વજન ઓછું થઈ ગયું હતું. આમ છતાં, તેમણે પરિવારને હિમ્મત આપી અને ક્યારેય મોતનો ડર પોતાના પર હાવી થવા દીધો નહોતો.

'સિનેમાના ઇતિહાસમાં મારું નામ અમર રહેશે'

તેમના કરિયર અને સંઘર્ષ વિશે વાત કરતા તેમણે કહ્યું હતું કે, "જ્યારે પણ હું આખરી વાર મારી આંખો બંધ કરીશ, સિનેમાના ઇતિહાસમાં મારું નામ ક્યાંક ને ક્યાંક અંકિત રહેશે." તેમણે ઉમેર્યું હતું કે તેઓ પહેલાથી જ આગમાંથી પસાર થઈ ચૂક્યા છે, તેથી તેમને કોઈ વાતનો ભય નહોતો.

ચાર દાયકાથી વધુ લાંબી ફિલ્મી સફર

પ્રદીપ રાવતે ચાર દાયકાથી વધુ સમય સુધી હિન્દી, તેલુગુ, તમિલ, કન્નડ, મલયાલમ અને અન્ય ભાષાઓની ફિલ્મોમાં કામ કર્યું હતું. બીઆર ચોપડાની 'મહાભારત'માં દ્રોણાચાર્યના પુત્ર 'અશ્વત્થામા'ના રોલથી તેમને ઘર-ઘરમાં ઓળખ મળી હતી. આ સિવાય 'અગ્નિપથ', 'સરફરોશ', 'લગાન' અને 'ગજની' જેવી ફિલ્મોમાં તેમના વિલન તેમજ સહાયક કલાકારના પાત્રોએ ભારતીય સિનેમામાં ઊંડી છાપ છોડી છે. જીવનના આખરી સમય સુધી તેઓ ફિલ્મોમાં સક્રિય રહ્યા હતા.