Entertainment: 'ઓપરેશન સફેદ સાગર' ટીઝર: નેટફ્લિક્સ પર દેખાશે કારગિલનું હવાઈ યુદ્ધ, રુંવાડા ઉભા કરી દેશે કહાની

કારગિલ યુદ્ધના બહાદુર સૈનિકોની શૌર્યગાથાઓએ હંમેશા દેશવાસીઓના દિલ જીત્યા છે. હવે, ઓટીટી પ્લેટફોર્મ નેટફ્લિક્સ (Netflix) વર્ષ ૧૯૯૯ના કારગિલ યુદ્ધ સાથે જોડાયેલી એક અજાણી અને રોમાંચક કહાની 'ઓપરેશન સફેદ સાગર' (Operation Safed Sagar) વેબ સિરીઝ સ્વરૂપે લઈને આવી રહ્યું છે. મેકર્સે આ મિલિટરી ડ્રામા સિરીઝનું શાનદાર ટીઝર રિલીઝ કરી દીધું છે, જેમાં જીમી શેરગિલ, સિદ્ધાર્થ, મિહિર આહુજા અને અભય વર્મા મુખ્ય ભૂમિકામાં જોવા મળી રહ્યા છે.

વાસ્તવિક ઘટના અને 'ગોલ્ડન એરોઝ સ્ક્વાડ્રન' પર આધારિત

શનિવારે રિલીઝ થયેલું આ ટીઝર દુનિયાના સૌથી ઊંચા પર્વતો પર લડાયેલા હવાઈ યુદ્ધની ઝલક દર્શાવે છે. આ સિરીઝ ભારતીય વાયુસેના (Indian Air Force) ના સૌથી પડકારજનક ઓપરેશન્સમાંથી એકથી પ્રેરિત છે. તેની વાર્તા ૧૯૯૯ના કારગિલ યુદ્ધ સમયની 'ગોલ્ડન એરોઝ સ્ક્વાડ્રન' ની અણકહી ગાથા રજૂ કરે છે.

ટીઝરમાં મિહિર આહુજા, અભય વર્મા અને તારુક રૈના ભારતના સૌથી યુવા એરફોર્સ પાઇલટ્સના રોલમાં છે, જેઓ કોઈ પણ ડર વગર ૧૬,૦૦૦ ફૂટની ઊંચાઈ પર હવાઈ જંગ લડવાની તૈયારી કરી રહ્યા છે. જ્યારે સિદ્ધાર્થ અને જીમી શેરગિલ સિનિયર ઓફિસર્સ તરીકે તેમને ગાઈડ કરી રહ્યા છે. સોશિયલ મીડિયા પર ટીઝર આવતાની સાથે જ ફેન્સના રુંવાડા ઉભા થઈ ગયા છે અને લોકો તેને જોરદાર પ્રતિસાદ આપી રહ્યા છે.

ક્યારે રિલીઝ થશે આ સિરીઝ?

ઓની સેનના નિર્દેશનમાં બનેલી આ હાઈ-બજેટ સિરીઝમાં સિદ્ધાર્થ, જીમી શેરગિલ અને અભય વર્મા ઉપરાંત દીયા મિર્ઝા, પ્રાજક્તા કોલી અને આદિલ હુસૈન જેવા દિગ્ગજ કલાકારો પણ મહત્વના રોલમાં જોવા મળશે. આ દેશભક્તિથી ભરપૂર સિરીઝ આગામી ૭ ઓગસ્ટના રોજ નેટફ્લિક્સ પર રિલીઝ થવા જઈ રહી છે.

પ્રોડ્યુસર્સે શેર કર્યો અનુભવ

આ શોના પ્રોડ્યુસર્સ અભિજીત સિંહ પરમાર અને મહેબૂબ પાલ સિંહ બરાડે જણાવ્યું કે, "આ સિરીઝ બનાવવાની પ્રેરણા અમને કો-ક્રિએટર કુશલ શ્રીવાસ્તવના ઈન્ડિયન એરફોર્સના અંગત અનુભવો પરથી મળી છે. ૧૬,૦૦૦ ફૂટથી વધુની ઊંચાઈ પર અને ૧૦૦થી વધુ લોકેશન્સ પર આ દુનિયાને ફરીથી આબેહૂબ પડદા પર કંડારવી ખૂબ મુશ્કેલ હતી. આ માત્ર યુદ્ધની નહીં, પરંતુ મિત્રતા, ત્યાગ, લીડરશીપ અને અઘરા નિર્ણયોની માનવીય વાર્તા છે."