Entertainment: 'પેપર લીક પછી મારી બધી ખુશીઓ છોડવી પડી હતી', માનુષી છિલ્લરે સંભળાવી 2015ના સંઘર્ષની કથા

'મિસ વર્લ્ડ ૨૦૧૭'નો તાજ જીતનારી અને બોલીવુડ અભિનેત્રી માનુષી છિલ્લર આજે ગ્લેમર વર્લ્ડનું જાણીતું નામ છે. પરંતુ બહુ ઓછા લોકો જાણે છે કે માનુષી એક્ટ્રેસ બનતા પહેલા મેડિકલનો અભ્યાસ કરતી હતી અને તેનું સપનું ડોક્ટર બનવાનું હતું. તાજેતરમાં સોહા અલી ખાનના યુટ્યુબ ટોક શો 'ઓલ અબાઉટ હર'માં માનુષી છિલ્લરે પોતાના જીવનના એ તબક્કા વિશે વાત કરી, જ્યારે ૨૦૧૫માં મેડિકલ એન્ટ્રન્સ એક્ઝામનું પેપર લીક થયું હતું અને તેના કારણે તેને ભારે મુશ્કેલીઓનો સામનો કરવો પડ્યો હતો.

'પેપર લીકના કારણે મારી દુનિયા સીમિત થઈ ગઈ હતી'

પોતાનો અનુભવ શેર કરતા માનુષીએ જણાવ્યું કે, "પેપર લીક થયા બાદ પરીક્ષા ફરીથી લેવાઈ, જેના કારણે એક આખું વર્ષ મારે મારી તમામ ખુશીઓ બાજુ પર મૂકવી પડી હતી. હું એક પ્રોફેસનલ કુચિપુડી ડાન્સર હતી અને મને પેઇન્ટિંગ કરવાનો તથા મિત્રો સાથે ફરવાનો શોખ હતો. પરંતુ પરીક્ષાની તૈયારી માટે મેં આ બધું જ છોડી દીધું. આખું વર્ષ માત્ર અભ્યાસ, કોચિંગ અને પુસ્તકો જ મારું કેન્દ્ર રહ્યા. મારી દુનિયા ખૂબ જ સીમિત થઈ ગઈ હતી."

'માતા-પિતાના સપોર્ટથી મુશ્કેલ તબક્કો પાર કર્યો'

માનુષીએ ઉમેર્યું કે, "મહિનાઓની સખત મહેનત પછી જ્યારે અચાનક ખબર પડે કે હજુ ૪૫ દિવસ ફરી મહેનત કરવી પડશે, ત્યારે મન થાકી જાય છે. મારે એવા બાળકો સાથે મુલાકાત થઈ હતી જેમના માતા-પિતાએ કોચિંગ માટે કરજ લીધું હતું. હું નસીબદાર હતી કે મને મારા પરિવારનો પૂરો સપોર્ટ મળ્યો. મારા માતા-પિતા પણ ડોક્ટર છે અને તેમણે મને માનસિક રીતે મજબૂત રાખી."

મેડિકલ કોલેજથી બોલીવુડ સુધીની સફર

મેડિકલ અભ્યાસ દરમિયાન બર્નઆઉટ અનુભવ્યા બાદ તેના જીવનમાં મોટો વળાંક આવ્યો. મિસ વર્લ્ડ બન્યા બાદ માનુષીએ ૨૦૨૨માં અક્ષય કુમાર સાથે 'સમ્રાટ પૃથ્વીરાજ' ફિલ્મથી બોલીવુડમાં ડેબ્યૂ કર્યું હતું. ત્યારબાદ તે 'ધ ગ્રેટ ઈન્ડિયન ફેમિલી', 'બડે મિયાં છોટે મિયાં' અને 'ઓપરેશન વેલેન્ટાઈન' જેવી ફિલ્મોમાં જોવા મળી છે.