Entertainment: કાર્તિક આર્યનની 'Naagzilla' માં થઈ વધુ એક ધમાકેદાર એન્ટ્રી, 'ઇચ્છાધારી નાગ' સાથે મળીને કરાવશે કોમેડીનો ઓવરડોઝ

કાર્તિક આર્યન અત્યારે પોતાની આગામી મોસ્ટ અવેટેડ ફિલ્મ 'નાગઝિલા' (Naagzilla) ના શૂટિંગમાં વ્યસ્ત છે. આ ફિલ્મમાં કાર્તિક લાઈફમાં પહેલીવાર એક 'ઇચ્છાધારી નાગ' ની ભૂમિકા ભજવી રહ્યો છે. આ હોરર-કોમેડી ડ્રામા ફિલ્મની હિરોઈન ફાઈનલ થયા બાદ હવે તેમાં વધુ એક એવા કલાકારની એન્ટ્રી થઈ છે, જેમનું નામ સાંભળતા જ ચહેરા પર હાસ્ય આવી જાય છે. આ વર્ષે ઘણી હિટ ફિલ્મોમાં પોતાની કોમેડીથી ધમાલ મચાવનાર આ એક્ટર હવે કાર્તિક સાથે જોડી જમાવશે.

રવિ કિશનની થઈ ભવ્ય એન્ટ્રી

આ દમદાર અભિનેતા બીજું કોઈ નહીં પણ ઇન્ડસ્ટ્રીના જાણીતા કલાકાર રવિ કિશન (Ravi Kishan) છે. ફિલ્મ 'લાપતા લેડીઝ' અને વેબ સિરીઝ 'મામલા લીગલ હૈ' ની અભૂતપૂર્વ સફળતા બાદ હિન્દી સિનેમામાં રવિ કિશનની ડિમાન્ડ ખૂબ જ વધી ગઈ છે. તેઓ 'સન ઓફ સરદાર ૨', 'પેદ્દી' અને 'ધમાલ ૪' જેવી ઘણી મોટી ફિલ્મોનો હિસ્સો બન્યા બાદ હવે કાર્તિક આર્યનની 'નાગઝિલા' માં પણ મહત્વની ભૂમિકામાં જોવા મળશે.

પ્રોડ્યુસરે કરી સત્તાવાર પુષ્ટિ

'ફુકરે' ફેમ ડાયરેક્ટર મૃગદીપ સિંહ લાંબાના નિર્દેશનમાં બની રહેલી આ ફિલ્મને કરણ જોહર અને મહાવીર જૈન સાથે મળીને પ્રોડ્યુસ કરી રહ્યા છે. ફિલ્મમાં રવિ કિશનની કાસ્ટિંગ અંગે પ્રોડ્યુસર મહાવીર જૈને સત્તાવાર પુષ્ટિ કરતા જણાવ્યું કે, "રવિ કિશન એક અદભુત અને પ્રોફેશનલ કલાકાર છે. આ ફિલ્મમાં તેઓ એક ખૂબ જ અનોખું અને ચુલબુલું પાત્ર ભજવી રહ્યા છે. તેમના આવવાથી ફિલ્મમાં મનોરંજનનો ગ્રાફ ઘણો ઊંચો ગયો છે. કાર્તિક અને રવિ કિશને પહેલીવાર સાથે કામ કર્યું છે અને સેટ પર બંનેની કેમિસ્ટ્રી કમાલની રહી છે."

ક્યારે રિલીઝ થશે ફિલ્મ?

આ ફિલ્મમાં કાર્તિક આર્યન અને રવિ કિશન ઉપરાંત દક્ષિણ ભારતની જાણીતી અભિનેત્રી પ્રીતિ મુકુંદન મુખ્ય હિરોઈન તરીકે જોવા મળશે. કાર્તિક આર્યનનો 'ઇચ્છાધારી નાગ' નો અંદાજ અને રવિ કિશનની પંચલાઈન પ્રેક્ષકોને હસાવી-હસાવીને લોથપોથ કરી દેશે તે ચોક્કસ છે. રિપોર્ટ્સ અનુસાર, આ ફિલ્મ આગામી વર્ષે 12 ફેબ્રુઆરીના રોજ સિનેમાઘરોમાં રિલીઝ થઈ શકે છે.