Entertainment: કરિશ્મા તન્ના નવજાત પુત્રને ઘરે લાવી, હોસ્પિટલ બહાર બાળકની પહેલી ઝલક જોઈને ટ્રોલર્સે કર્યા સવાલ

બોલિવૂડ અને ટીવી ઈન્ડસ્ટ્રીની જાણીતી અભિનેત્રી કરિશ્મા તન્ના અને તેના પતિ વરુણ બંગેરાના ઘરે ખુશીનો માહોલ છે. ૨૯ જુલાઈએ આ કપલે તેમના પહેલા બાળકના રૂપમાં પુત્રનું સ્વાગત કર્યું હતું. શનિવારે, ૧ ઓગસ્ટે કરિશ્માને હોસ્પિટલમાંથી રજા મળ્યા બાદ તે પતિ અને નવજાત શિશુ સાથે પોતાના મુંબઈ સ્થિત ઘરે પહોંચી હતી. જોકે, બાળકની પહેલી ઝલક સામે આવ્યા બાદ સોશિયલ મીડિયા પર લોકોએ તેને તેડીને લાવવાની રીત પર સવાલો ઉઠાવ્યા છે.

હોસ્પિટલ બહાર નવજાત પુત્ર સાથે દેખાયું કપલ

પેપરાઝી દ્વારા શેર કરવામાં આવેલા વીડિયોમાં, વરુણ બંગેરા અને કરિશ્મા તન્નાએ તેમના બાળકના મુખને છુપાવીને રાખ્યું હતું. વરુણ નવજાત શિશુને ખાસ 'બેબી કેરીઅર' (બાસ્કેટ)માં લઈને જતો જોવા મળ્યો હતો. ચાહકોએ કપલને માતા-પિતા બનવા બદલ અભિનંદન પાઠવ્યા હતા અને તેમની ખુશીમાં સહભાગી થયા હતા.

બાળકની સંભાળ રાખવાની રીત પર લોકો કેમ ભડક્યા?

જોકે, વરુણ દ્વારા બાળકને પકડવાની આ રીત સોશિયલ મીડિયા યુઝર્સને પસંદ આવી ન હતી. વીડિયો વાયરલ થતાં જ લોકોએ કમેન્ટ સેક્શનમાં પોતાનો ગુસ્સો ઠાલવ્યો હતો.

એક યુઝરે લખ્યું, "આ નાનું બાળક છે કે કોઈ શોપિંગનો સામાન?" જ્યારે બીજા યુઝરે સવાલ કર્યો, "નવજાત બાળકને આ રીતે બાસ્કેટમાં કેમ પકડ્યું છે? બાળકની પહેલી મુલાકાતમાં આ રીતે લઈ જવું યોગ્ય નથી." લોકોનું માનવું હતું કે નાના બાળકને પ્રેમથી ખોળામાં તેડવું જોઈતું હતું.

ગુરુપૂર્ણિમાના પવિત્ર દિવસે જન્મ્યો 'નાનો મહેમાન'

ઉલ્લેખનીય છે કે, કરિશ્મા અને વરુણે ગુરુપૂર્ણિમાના ખાસ દિવસે પોતાના પુત્રનું સ્વાગત કર્યું હતું. સોશિયલ મીડિયા પર પોસ્ટ શેર કરીને તેમણે લખ્યું હતું કે, "ગુરુપૂર્ણિમાના પવિત્ર દિવસે જન્મ થયો... અમારો સૌથી મોટો આશીર્વાદ અમારી સાથે છે. અમારી દુનિયામાં તારું સ્વાગત છે."

કરિશ્મા અને વરુણના લગ્ન ફેબ્રુઆરી ૨૦૨૨માં થયા હતા. હવે કરિશ્મા ટૂંક સમયમાં જ ફિલ્મ 'મોમ ૨'માં ખુશી કપૂર સાથે મહત્વની ભૂમિકામાં જોવા મળશે.