Entertainment: લગ્નના 4 વર્ષ પછી માતા-પિતા બન્યા કરિશ્મા તન્ના અને વરુણ બંગેરા, ગુરુ પૂર્ણિમાના દિવસે ઘરે આવ્યો નાનો મહેમાન

લગ્નના ચાર વર્ષ બાદ અભિનેત્રી કરિશ્મા તન્ના (Karishma Tanna) અને વરુણ બંગેરા (Varun Bangera)ના ઘરે ખુશીઓએ દસ્તક આપી છે. કરિશ્માએ ૨૯ જુલાઈ, ૨૦૨૬ના રોજ એક પુત્રને જન્મ આપ્યો છે. અભિનેત્રીએ પોતે સોશિયલ મીડિયા દ્વારા આ સમાચાર પોતાના ચાહકો સાથે શેર કર્યા છે.

સોશિયલ મીડિયા પર કરિશ્માએ એક ખાસ નોટ શેર કરતા લખ્યું, 'ગુરુ પૂર્ણિમાના પવિત્ર દિવસે જન્મ થયો... અમારા સૌથી મોટા આશીર્વાદ અમારી વચ્ચે છે. ૨૯ જુલાઈ ૨૦૨૬. અમારી દુનિયામાં તમારું સ્વાગત છે, નાના મહેમાન. કરિશ્મા અને વરુણ.'

અનેક સેલેબ્સે દંપતીને આપ્યા અભિનંદન

આ જાહેરાત બાદ સોશિયલ મીડિયા પર અભિનંદનની વર્ષા થઈ રહી છે. અનેક ચાહકો અને સેલેબ્સ આ નવા માતા-પિતા પર પ્રેમ અને આશીર્વાદ વરસાવી રહ્યા છે. ખુશી કપૂર, અંજલિ આનંદ, સોનલ ચૌહાણ, અનુષ્કા રંજન, વામિકા ગબ્બી અને અન્ય અભિનેત્રીઓએ કરિશ્મા અને વરુણને આ ખાસ પ્રસંગે શુભેચ્છા પાઠવી હતી.

કરિશ્માએ ૬ એપ્રિલ, ૨૦૨૬ના રોજ પોતાની પ્રેગ્નન્સીની જાહેરાત કરી હતી. આ સમાચાર આવ્યા બાદથી ફેન્સ ખૂબ જ ઉત્સાહિત હતા. હવે તેમની જિંદગીના આ નવા ચેપ્ટરને લઈને કપલની ખુશી સ્પષ્ટપણે જોઈ શકાય છે. તાજેતરમાં જ કરિશ્માએ મેટરનિટી ફોટોશૂટની તસવીરો પણ શેર કરી હતી, જે ખૂબ જ સુંદર લાગી રહી હતી.

વર્ષ ૨૦૨૨માં થયા હતા લગ્ન

કરિશ્મા તન્ના અને વરુણ બંગેરાએ ૫ ફેબ્રુઆરી, ૨૦૨૨ના રોજ મુંબઈમાં એક પ્રાઈવેટ સેરેમનીમાં લગ્ન કર્યા હતા, જેમાં તેમના નજીકના મિત્રો અને પરિવારના સભ્યો સામેલ થયા હતા. કરિશ્માએ વર્ષ ૨૦૦૧માં ટીવી સિરિયલ 'ક્યોંકિ સાસ ભી કભી બહૂ થી'થી ડેબ્યૂ કર્યું હતું. તે છેલ્લે હંસલ મહેતાની વેબ સીરિઝ 'સ્કૂપ'માં જોવા મળી હતી, જે ૨૦૨૩માં રિલીઝ થઈ હતી.

કરિશ્માએ આ શ્રેણીમાં પત્રકાર જાગૃતિ પાઠકની ભૂમિકા ભજવી હતી. આ પાત્ર પૂર્વ પત્રકાર જિગ્ના વોરા પર આધારિત હતું.