Entertainment: 'તમે કોઈ બીજા સાથે લગ્ન કરી લો', હીના ખાને પતિ સામે કરી હતી જીદ, કેન્સર સામે હારીને પ્રેમ કુરબાન કરવા થઈ તૈયાર

લોકપ્રિય એક્ટ્રેસ હીના ખાને જૂન મહિનામાં પોતાના લગ્નની પ્રથમ વર્ષગાંઠ ઉજવી હતી. 'યે રિશ્તા ક્યા કહલાતા હૈ' ફેમ એક્ટ્રેસે તેના લાંબા સમયના બોયફ્રેન્ડ રોકી જેસ્વાલ સાથે એક પ્રાઈવેટ સરેમનીમાં લગ્ન કર્યા હતા. તે સમયે હીના સ્ટેજ-૩ બ્રેસ્ટ કેન્સર સામે ઝઝૂમી રહી હતી. લગ્ન બાદ આ કપલ એક રિયાલિટી શોમાં પણ જોવા મળ્યું હતું, જ્યાં કેટલાક લોકોએ તેમના લગ્નને પબ્લિસિટી સ્ટંટ ગણાવ્યા હતા. જોકે, હીનાએ પોતાના પોડકાસ્ટ 'POV' માં આ તમામ અફવાઓ પર મૌન તોડ્યું છે.

૧૩-૧૪ વર્ષ ડેટિંગ કર્યા બાદ કર્યા લગ્ન

હીના ખાન અને રોકીની મુલાકાત 'યે રિશ્તા ક્યા કહલાતા હૈ' ના સેટ પર થઈ હતી. આશરે ૧૩-૧૪ વર્ષ સુધી એકબીજાને ડેટ કર્યા બાદ બંનેએ લગ્ન કરવાનો નિર્ણય લીધો હતો. લગ્નને પબ્લિસિટી સ્ટંટ કહેવા પર હીનાએ કહ્યું, "લોકો શું કહે છે તેનાથી મને કોઈ ફરક પડતો નથી. અમે સત્ય જાણીએ છીએ. જો તમે આને પબ્લિસિટીની નજરે જોશો તો સાચું કારણ ગાયબ થઈ જશે." રોકીએ પણ ઉમેર્યું કે લોકો જૂઠ પર વિશ્વાસ કરવાના એટલા ટેવાઈ ગયા છે કે સાચો પ્રેમ પણ તેમને ડ્રામા લાગે છે.

'તમે બીજી છોકરી સાથે લગ્ન કરી લો'

કેન્સર સામેની પોતાની કઠિન લડાઈના દિવસો યાદ કરતાં હીના ખાને ભાવુક થઈને કહ્યું, "અમે ખૂબ જ મુશ્કેલ સમયમાંથી પસાર થઈ રહ્યા હતા. સ્વાસ્થ્યની સ્થિતિ એટલી ખરાબ હતી કે એક સમયે મેં રોકીને કહ્યું હતું કે તે કોઈ બીજા સાથે લગ્ન કરી લે. મેં તેને કહ્યું હતું કે હવે પરિસ્થિતિ પહેલા જેવી નથી રહેવાની. હું તેને એટલો પ્રેમ કરું છું કે મારા કરતા તેની ખુશી મારા માટે વધુ મહત્વની હતી."

રોકીએ દરેક મુશ્કેલ ઘડીમાં સાથ નિભાવ્યો

હીનાએ આગળ જણાવ્યું કે, "રોકીએ દરેક મુશ્કેલ પરિસ્થિતિમાં મારી સાથે રહેવાનો નિર્ણય કર્યો. તે સમય ખૂબ જ કઠિન હતો અને અમારે કેટલાક આકરા નિર્ણયો લેવા પડ્યા હતા. જે લોકો તે સમયે મારી સાથે હતા તેઓ જાણે છે કે રોકીના કારણે જ હું આ બીમારી સામે લડી શકી છું." ઉલ્લેખનીય છે કે હીના અને રોકીના પ્રેમ અને સમર્પણના આજે લાખો ફેન્સ દીવાના છે.