Entertainment: CWG 2026: બોલિવૂડ ફિલ્મ જોઈને શીખી બોક્સિંગ! ફાતિમા ઝહરાએ ઈતિહાસ રચ્યો, બની પાકિસ્તાનની પ્રથમ મહિલા મેડલ વિજેતા

ભારતના સ્ટાર બોક્સર મેરી કોમે દેશના અનેક ખેલાડીઓને પ્રેરણા આપી છે, પરંતુ છ વખતના વર્લ્ડ ચેમ્પિયનનો પ્રભાવ હવે સીમાઓ ઓળંગીને પાકિસ્તાન સુધી પહોંચ્યો છે. પાકિસ્તાનની પ્રથમ મહિલા કોમનવેલ્થ ગેમ્સ મેડલિસ્ટ ફાતિમા ઝહરાએ ખુલાસો કર્યો છે કે મેરી કોમની બાયોપિક ફિલ્મ જોયા બાદ જ ૧૦ વર્ષની ઉંમરે તેણે બોક્સર બનવાનો નિર્ણય લીધો હતો.

CWG 2026માં જીત્યો બ્રોન્ઝ મેડલ

પાકિસ્તાનના પંજાબ પ્રાંતના સરગોધા શહેરની ૨૨ વર્ષીય ફાતિમા ઝહરાએ કોમનવેલ્થ ગેમ્સ ૨૦૨૬ માં ૬૦ કિગ્રા કેટેગરીમાં બ્રોન્ઝ મેડલ જીતીને નવો ઈતિહાસ રચ્યો છે. કોમનવેલ્થ ગેમ્સની બોક્સિંગ સ્પર્ધામાં મેડલ જીતનારી તે પાકિસ્તાનની સર્વપ્રથમ મહિલા ખેલાડી બની ગઈ છે. પાકિસ્તાનમાં મહિલા બોક્સર તરીકે કોઈ રોલ મોડલ ન હોવાથી ફાતિમાએ ભારતની મેરી કોમને પોતાના આદર્શ માન્યા હતા.

"મેરી કોમની ફિલ્મ જોઈને ટ્રેનિંગ કરતી હતી"

મેડલ જીત્યા બાદ મીડિયા સાથે વાતચિત કરતા ફાતિમાએ કહ્યું, "હું ભારતની મેરી કોમથી ખૂબ પ્રેરિત છું. જ્યારે મેં બોક્સિંગ શરૂ કર્યું, ત્યારે હું તેમની જિંદગી પર બનેલી ફિલ્મ જોઈને ટ્રેનિંગ કરતી હતી. હું તેમનો ખૂબ આદર કરું છું અને ઇંશાઅલ્લાહ, એક દિવસ હું પણ તેમના જેવી બનીશ. મને આશા છે કે હું તેમને રૂબરૂ મળી શકીશ."

ઉલ્લેખનીય છે કે વર્ષ ૨૦૧૪ માં આવેલી બોલિવૂડ ફિલ્મ 'મેરી કોમ'માં પ્રિયંકા ચોપરાએ મેરી કોમની ભૂમિકા ભજવી હતી. આ ફિલ્મે નેશનલ એવોર્ડ પણ જીત્યો હતો.

પરિવારના વિરોધ છતાં ન હારી હિંમત

મેરી કોમની જેમ જ ફાતિમાનો સંઘર્ષ પણ આસાનીથી ભરેલો નહોતો. મધ્યમ વર્ગીય પરિવારમાંથી આવતી ફાતિમાને શરૂઆતમાં ઘરમાં જ ભારે વિરોધનો સામનો કરવો પડ્યો હતો. તેણે જણાવ્યું, "મારો પરિવાર બોક્સિંગની વિરુદ્ધમાં હતો. તેઓ મને ટ્રેનિંગ માટે જવા દેતા નહોતા, પરંતુ મેં તેમની સામે લડત આપી અને ટ્રેનિંગ ચાલુ રાખી."

ફાતિમાને આશા છે કે તેનો આ ઐતિહાસિક મેડલ પાકિસ્તાનની અન્ય છોકરીઓને પણ રૂઢિચુસ્ત વિચારસરણી તોડીને રમતોમાં આગળ આવવા માટે પ્રેરણા આપશે.