Entertainment: 'વાંકડિયા વાળવાળા સીતાજી...' રામાયણમાં સાઈ પલ્લવીના રોલ પર દીપિકા ચિખલિયાની ટિપ્પણી, અરુણ ગોવિલને કર્યો સપોર્ટ

રામાનંદ સાગરના વિખ્યાત ટીવી શો 'રામાયણ'માં સીતાજીનું પાત્ર ભજવીને ઘરે-ઘરે લોકપ્રિયતા મેળવનાર એક્ટ્રેસ દીપિકા ચિખલિયાએ તાજેતરમાં એક ઈન્ટરવ્યુમાં નિતેશ તિવારીની આગામી ફિલ્મ 'રામાયણ' (Ramayana) અંગે પોતાની પ્રતિક્રિયા આપી છે. તેમણે ખાસ કરીને ફિલ્મમાં સીતાનો રોલ કરી રહેલી સાઉથ એક્ટ્રેસ સાઈ પલ્લવી (Sai Pallavi) વિશે પોતાના વિચારો વ્યક્ત કર્યા છે.

'વેરાયટી ઈન્ડિયા' સાથેની વાતચીતમાં દીપિકાએ અરુણ ગોવિલની રાજા દશરથ તરીકે રામાયણની દુનિયામાં વાપસી, મૂળ સીરિયલના ક્યારેય ન પૂરા થનારા વારસા અને સીતાનો રોલ કરવાથી પોતાની કરિયર પર પડેલી અસર વિશે પણ ચર્ચા કરી હતી.

સાઈ પલ્લવીના રોલ પર શું બોલ્યા દીપિકા?

જ્યારે દીપિકાને સાઈ પલ્લવીના સીતાના રોલ વિશે પૂછવામાં આવ્યું ત્યારે તેમણે સાઈને ખૂબ જ ટેલેન્ટેડ ગણાવી હતી, પરંતુ સાથે એ પણ ઉમેર્યું કે તેની પરફોર્મન્સ જોયા વગર તેને કાસ્ટ કરવાના નિર્ણય પર નિર્ણય લેવો ખોટો ગણાશે.

તેમણે જણાવ્યું કે, "મેં તેમનું કામ જોયું છે, તેઓ ખૂબ જ શાનદાર એક્ટ્રેસ છે. પરંતુ મને નથી ખબર કે તેઓ સીતાના પાત્રમાં કેવા લાગશે. જ્યારે આપણે તેમને પડદા પર જોઈશું, ત્યારે જ ખબર પડશે. અત્યારે તો મને આ અંગે કંઈ ખબર નથી."

ટીવીના 'સીતા'એ કરી સરખામણી

આ પછી દીપિકાએ તુલસીદાસજીની રામાયણમાં સીતાજીના વર્ણનનો ઉલ્લેખ કરતા જણાવ્યું કે રામાનંદ સાગરે આ પાત્ર માટે અમુક ખાસ શારીરિક ગુણો ધરાવતી એક્ટ્રેસની શોધ કરી હતી.

દીપિકાએ ઉમેર્યું કે, "તુલસીદાસની રામાયણમાં સીતાજીનું વર્ણન બદામ જેવી આંખો, એક ખાસ કદ-કાઠી, વાળ અને રૂપ-રંગ ધરાવતી સ્ત્રી તરીકે કરવામાં આવ્યું છે. રામાનંદ સાગરને આવી જ એક્ટ્રેસની તલાશ હતી અને તેમને આ ગુણો મારામાં દેખાયા હતા. મને લાગે છે કે અમારી 'રામાયણ' નવી 'રામાયણ' પર ભારે પડશે. કોરોના કાળ દરમિયાન જ્યારે તેને ટીવી પર ફરી પ્રસારિત કરવામાં આવી ત્યારે નવી પેઢીએ પણ તેને જોઈ હતી અને તેમના મગજમાં સીતાજીની એ જ છબી બનેલી છે. હવે આ નવી રામાયણમાં વાંકડિયા વાળ (curly hair) વાળા સીતાજીને કદાચ લોકો સ્વીકારી ન પણ શકે."

દિવાળી પર રિલીઝ થશે પહેલો ભાગ

ઉલ્લેખનીય છે કે નિતેશ તિવારીની આ બહુચર્ચિત ફિલ્મમાં રણબીર કપૂર ભગવાન રામ, યશ રાવણ, સની દેઓલ હનુમાનજી અને રવિ દુબે લક્ષ્મણના રોલમાં જોવા મળશે. આ ફિલ્મનો પહેલો ભાગ દિવાળીના તહેવાર પર સિનેમાઘરોમાં રિલીઝ થવા જઈ રહ્યો છે.