Entertainment: અસમ પૂર પીડિતોની મદદે આવ્યું બોલિવૂડ, સલમાન ખાન બનાવી રહ્યા છે 'આશિયાના'; અનુપમ ખેરે દાન કર્યા ૫ લાખ

અસમમાં હાલમાં પૂરના કારણે સ્થિતિ અત્યંત ગંભીર બની છે. ત્યાં પૂરના લીધે લાખો લોકોનું જીવન પ્રભાવિત થયું છે અને અનેક લોકોએ પોતાના જીવ ગુમાવ્યા છે. આ વિનાશક સંકટના સમયે બોલિવૂડ કલાકારો અસમના પૂર પીડિતોની મદદે આગળ આવ્યા છે. અનેક સિતારાઓ રાહત કાર્યોમાં મદદ કરી રહ્યા છે તો કેટલાક સોશિયલ મીડિયા દ્વારા લોકોને મદદ કરવાની અપીલ કરી રહ્યા છે.

અનુપમ ખેરે ૫ લાખ રૂપિયાનું કર્યું દાન

અભિનેતા અનુપમ ખેરે પૂરથી પ્રભાવિત થયેલા પરિવારોને સમર્થન આપતા અસમના મુખ્યામંત્રી રાહત ફંડમાં ૫ લાખ રૂપિયાનું દાન આપ્યું છે. તેમણે સોશિયલ મીડિયા પર વિડીયો શેર કરીને દુઃખ વ્યક્ત કર્યું હતું અને કહ્યું હતું કે, "પૂરના દ્રશ્યો જોઈને મને ભારે દુઃખ થઈ રહ્યું છે. અનેક લોકોએ પોતાના સ્વજનો અને ઘરો ગુમાવ્યા છે. જો આપણે બધા ભેગા મળીને પોતાની ક્ષમતા મુજબ મદદ કરીએ તો પીડિતો માટે જીવન થોડું સરળ બની શકે છે."

સલમાન ખાનનું 'આશિયાના' મિશન

અનુપમ ખેર ઉપરાંત સલમાન ખાને પણ પોતાના ફાઉન્ડેશન અને લોકલ ફેન ક્લબ સાથે મળીને મદદ પહોંચાડવાનું શરૂ કર્યું છે. રિપોર્ટ્સ અનુસાર, સલમાન ખાને 'ગ્લોબલ સિખ્સ' સાથે મળીને 'આશિયાના' નામનો એક નવો પ્રોજેક્ટ શરૂ કર્યો છે. આ પ્રોજેક્ટનો મુખ્ય હેતુ પૂરના કારણે જે લોકોએ પોતાના ઘર ગુમાવ્યા છે તેમને સુરક્ષિત આશ્રય પૂરો પાડવાનો છે.

રણદીપ હૂડા અને કાર્તિક આર્યન સહિતના કલાકારોની મદદ

અભિનેતા રણદીપ હૂડા પોતે અસમ પહોંચીને એનજીઓ સાથે મળીને ગ્રાઉન્ડ લેવલ પર રાહત કાર્યોમાં જોડાયા છે. જ્યારે કાર્તિક આર્યને મુખ્યમંત્રી રાહત ફંડમાં ૧ કરોડ રૂપિયાનું દાન આપ્યું છે. આ સિવાય આમીર ખાન, ભૂમિ પેડનેકર, આયુષ્યમાન ખુરાના, અર્જુન કપૂર, રોહિત શેટ્ટી અને સોનુ નિગમ જેવા અનેક બોલિવૂડ સિતારાઓએ પણ અસમ પૂર પીડિતો માટે આર્થિક અને સાધન સામગ્રીની સહાય કરી છે.