Entertainment: 83 વર્ષની ઉંમરે નોન-સ્ટોપ કામ કરી રહ્યા છે અમિતાભ બચ્ચન, બિગ બીએ પૂરી કરી 24 કલાકની શિફ્ટ

83 વર્ષની ઉંમરે પણ બોલિવૂડના મહાનાયક અમિતાભ બચ્ચનનું કામ પ્રત્યેનું સમર્પણ જોઈને આજની યુવા પેઢી પણ આશ્ચર્યચકિત થઈ જાય તેમ છે. તેમણે તાજેતરમાં જ તેમના લોકપ્રિય ક્વિઝ શો 'કૌન બનેગા કરોડપતિ' (KBC) ના આગામી સીઝનના શૂટિંગ દરમિયાન સતત 24 કલાકની સખત શિફ્ટ પૂરી કરીને એક નવો દાખલો બેસાડ્યો છે.

અમિતાભે સળંગ ૨૪ કલાક કર્યું શૂટિંગ

અમિતાભ બચ્ચને પોતે આ અંગે જાણકારી આપતા જણાવ્યું હતું કે તેમણે સવારે ૭ વાગ્યે શૂટિંગ શરૂ કર્યું હતું અને સતત કામ કરીને બીજા દિવસે સવારે ૭ વાગ્યે જ પૂરું કર્યું હતું. તેમણે સ્પષ્ટ કર્યું કે શોના પ્રીમિયરની તારીખ અગાઉથી નક્કી થઈ ગઈ હોવાથી આ શિડ્યુલમાં કોઈ ફેરફાર શક્ય નહોતો.

પોતાના બ્લોગ પર ચાહકો સાથે વિગતો શેર કરતા બિગ બીએ લખ્યું, "આજે સવારે ૭ વાગ્યે કામ પૂરું થયું, જે ગઈકાલે સવારે ૭ વાગ્યે શરૂ થયું હતું. પરંતુ શોને નિયત સમયે દર્શકો સમક્ષ લાવવો જરૂરી હતો, તેથી મેં બ્રેક લીધા વિના કામ પૂરું કર્યું."

તેમણે ઉમેર્યું કે 'કૌન બનેગા કરોડપતિ ૧૮' ની લોન્ચ ડેટ જાહેર થઈ ચૂકી હોવાથી વિલંબ માટે કોઈ અવકાશ નહોતો. રમુજી અંદાજમાં તેમણે એવું પણ કહ્યું કે જો તેઓ શૂટિંગ સમયસર પૂરું ન કરત, તો કદાચ તેમને હોસ્ટિંગની નોકરી ગુમાવવી પડત!

શું છે નવી સીઝનની થીમ?

'કૌન બનેગા કરોડપતિ' ની ૧૮મી સીઝન આ જ મહિને ૧૦ ઓગસ્ટથી રાત્રે ૯ વાગ્યે સોની ટીવી પર પ્રસારિત થશે. અમિતાભ બચ્ચન ફરી એકવાર હોસ્ટ તરીકે વાપસી કરી રહ્યા છે. આ સીઝનની મુખ્ય થીમ ‘સોચના પડેગા’ (વિચારવું પડશે) રાખવામાં આવી છે. આ થીમ દર્શાવે છે કે આજના ડિજિટલ યુગમાં જ્યાં માહિતી સૌની પાસે ઉપલબ્ધ છે, ત્યાં સાચો ફાયદો એ જ મેળવી શકે છે જે તે માહિતીનો યોગ્ય ઉપયોગ અને સમજણ કેળવે.