Entertainment: કાઇમ પેટ્રોલમાંથી અનૂપ સોનીની રજા! હવે અજય દેવગન બતાવશે ગુનાની હેરાન કરતી વાર્તાઓ

સોની ટીવી પર વર્ષોથી દર્શકોનો પ્રિય રહેલો લોકપ્રિય શો 'ક્રાઇમ પેટ્રોલ' ફરી એકવાર ટીવી પર કમબેક કરી રહ્યો છે. સચ્ચાઈ અને વાસ્તવિક ઘટનાઓ પર આધારિત આ શોમાં આ વખતે એક મોટો ફેરફાર જોવા મળશે. શોના આઈકોનિક હોસ્ટ અનૂપ સોનીની જગ્યાએ હવે બોલિવૂડ સુપરસ્ટાર અજય દેવગન હોસ્ટ તરીકે નજરે પડશે.

નવા સીઝનમાં અજય દેવગન બતાવશે ગુનાના કિસ્સા

'ક્રાઇમ પેટ્રોલ 2026 - ક્રાઇમ કા કરન્ટ સઝન' નો નવો પ્રોમો રિલીઝ થઈ ગયો છે, જેમાં અજય દેવગન કેમેરા સામે હોસ્ટ તરીકે જોવા મળે છે. તેઓ જણાવે છે કે ઘણીવાર ગુનો કરનાર વ્યક્તિ પરિવાર કે આસપાસની ઓળખીતી જ હોય છે, જે અત્યંત ચોંકાવનારી બાબત છે. અજય આ સીઝનમાં એવા કિસ્સાઓ લઈને આવી રહ્યા છે જેણે સમગ્ર દેશને હચમચાવી દીધો હતો. તેમનો ઉદ્દેશ્ય લોકોને ડરાવવાનો નહીં પરંતુ ગુનાઓ સામે જાગૃત કરવાનો છે.

૩૧ ઓગસ્ટથી ટેલિકાસ્ટ થશે શો

અજય દેવગન ૩૧ ઓગસ્ટથી સોની ટીવી પર આ શો હોસ્ટ કરતા જોવા મળશે. અહેવાલો મુજબ તેમણે અત્યાર સુધીમાં ૧૫ એપિસોડનું શૂટિંગ પૂર્ણ કરી લીધું છે. આગળ આ શોનું શૂટિંગ ચાલુ રાખવું કે નહીં તેનો નિર્ણય દર્શકોના રિસ્પોન્સ પર નિર્ભર રહેશે.

અનૂપ સોનીને કર્યા રિપ્લેસ

અનૂપ સોની વર્ષ ૨૦૧૦ થી ૨૦૧૮ સુધી એટલે કે સતત ૮ વર્ષ સુધી આ શોની ઓળખ રહ્યા હતા. તેમની ફેમસ લાઈન 'સાવધાન રહો, સતર્ક રહો' લોકોમાં ખૂબ લોકપ્રિય બની હતી. આશરે ૧૦૦૦ એપિસોડ્સ બાદ હવે અજય દેવગન તેમની જગ્યા લેવા જઈ રહ્યા છે, જે તેમના માટે પણ એક મોટો પડકાર અને જવાબદારી રહેશે.