તારક મહેતા કા ઉલ્ટા ચશ્મા: તારક મહેતાના મેકર્સનો નવો પ્લાન કે માત્ર અફવા? જાણો કેમ ચર્ચાઈ રહ્યું છે જેઠાલાલનું નામ!

છેલ્લા 18 વર્ષથી અવિરતપણે દર્શકોનું મનોરંજન કરી રહેલા ટેલિવિઝનના લોકપ્રિય કોમેડી શો 'તારક મહેતા કા ઉલ્ટા ચશ્મા' ના ચાહકો માટે એક ચિંતાજનક અને ચોંકાવનારા સમાચાર સામે આવ્યા છે. શોની શરૂઆતથી લઈને આજ સુધી દર્શકોના દિલ પર રાજ કરનાર મુખ્ય પાત્ર 'જેઠાલાલ' એટલે કે અભિનેતા દિલીપ જોશીનો રોલ (ટ્રેક) આગામી સમયમાં ઓછો કરવાનું પ્લાનિંગ ચાલી રહ્યું હોવાના મીડિયા અહેવાલો વહેતા થયા છે. આ સમાચારે સોશિયલ મીડિયા પર ભારે ચર્ચા જગાવી છે.

સૂત્રો અને મીડિયા રિપોર્ટ્સ અનુસાર, 'તારક મહેતા...' ના મેકર્સ હાલમાં શોમાં નવી એન્ટ્રી લેનારી રાજસ્થાની ફેમિલી પર વધારે ફોકસ કરવા માંગે છે. આ પરિવારમાં ચાર સભ્યો છે, જેમાં પતિ રત્ન સિંહ બિંજોલા (અભિનેતા કુલદીપ ગોર) અને પત્ની રૂપા (અભિનેત્રી ધરતી ભટ્ટ) મુખ્ય પાત્રો ભજવી રહ્યા છે. શોની વાર્તા મુજબ રત્ન સાડીની દુકાન ચલાવે છે અને આ નવી ફેમિલીનો ટ્રેક હાલમાં ઓડિયન્સને ખૂબ પસંદ આવી રહ્યો હોવાથી મેકર્સ આ નવી વાર્તાને વધુ સ્ક્રીન ટાઈમ આપી રહ્યા છે.

બીજી તરફ, દિલીપ જોશી આ શોના સૌથી હાઈએસ્ટ પેડ (સૌથી વધુ ફી લેતા) એક્ટર છે અને તેઓ મહિનામાં આશરે 15 દિવસ શૂટિંગ કરે છે. લાંબા સમયથી દયાબેનનું પાત્ર શોમાંથી મિસિંગ હોવાથી જેઠાલાલ-દયાબેનનો લોકપ્રિય ટ્રેક બની શકતો નથી. તાજેતરમાં જ મેકર્સ દ્વારા બાઘા-બાવરીના લવ એંગલ પર વધુ ફોકસ કરવામાં આવ્યું હતું, જેના કારણે જેઠાલાલનો રોલ એપિસોડ્સમાં ઓછો જોવા મળ્યો હતો. સ્ક્રીન પર જેઠાલાલ ઓછા દેખાવાને કારણે સોશિયલ મીડિયા પર તારક મહેતાના સત્તાવાર પેજ અને કમેન્ટ સેક્શનમાં દર્શકોએ અવાજ ઉઠાવવાનું શરૂ કર્યું છે. ચાહકો સતત કમેન્ટ કરીને મેકર્સને પૂછી રહ્યા છે કે "દિલીપ જોશી ક્યાં છે?"

લોકોનું સ્પષ્ટપણે માનવું છે કે દિલીપ જોશી આ શોનો ‘જીવ’ છે. દયાબેનની વિદાય બાદ જો જેઠાલાલના રોલને પણ ઓછો કે સાઇડલાઇન કરવામાં આવશે, તો તે શોના ભવિષ્ય માટે મોટો જોખમી નિર્ણય સાબિત થઈ શકે છે. જો કે, જેઠાલાલના ટ્રેકને ઓછો કરવા બાબતે અસિત કુમાર મોદી અથવા શોના પ્રોડક્શન હાઉસ તરફથી હજુ સુધી કોઈ સત્તાવાર (ઓફિશિયલ) નિવેદન કે પુષ્ટિ કરવામાં આવી નથી. હવે આગામી સમયમાં મેકર્સ આ લોકપ્રિય પાત્રને લઈને શું અંતિમ નિર્ણય લે છે, તેના પર જ સૌ ચાહકોની નજર ટકેલી છે.